İşbu bin yüz yetmiş dört senesi ramazanının on beşinci isneyn gicesi sulb-i pâkîze-sirişt-i Şehinşâhî'den bir gevher-i ʿâlemtâb ve bir duhter-i ʿismet-meʾâb zîb-ârây-ı kımât-ı vücûd ve zînet-bahş-ı gehvâre-i şuhûd olup, Şâh Sultân ismiyle tesmiye olun- olduğu haber-i meserret-eserini Dârü's-saʿâde Ağası Sadrıaʿzam tarafına îsâl ve müşârun ileyh tarafından envâʿ-ı sürûr u şâdmânî izhâr olunarak, Ağa-yı müşârun ileyhe muʿtâd olan ʿatâyâyı bilâ-kusûr iczâl ile îfây-ı resm-i ibcâl ve ferdâsı işbu velâdet-i pür-meymenet etrâf ü eknâfa işâʿat ve ʿîd-i şerîfin ikinci günü şehr-âyîn ısmarlanup, aʿlâ vü ednâ tedârüke mübâderet eylediler. Ber minvâl-i muharrer yevm-i sânî-yi ʿîd hulûlünde büyût u zokāk ve dekâkîn ü esvâkı tezyîn ve reşk-fermây-ı huld-berîn eylediklerinden fazla Serây-ı hümâyûn'da vâkiʿ emâkin ve mevâkıʿ zînet ü zîb ve ârâyiş-i dil-firîb ile pür-nakş ü nigâr ve âvîzehâ-yı rengâreng ve setâyir-i zer-dûz-i bî-denk ile cilâ-bahş-ı aʿyun-i sıgār u kibâr kılınup, bâzendegân ve sâzendegân taraf taraf söz ü sâz ile küşâyişde havâtır-ı âlemiyân olup, eyyâm-ı maʿdûde-i donanma resîde-i hayyiz-i intihâ ve me'lûf-i zevk u safâ olan erbâb-ı lehv ü hevâ: Ne ʿaceb tîz giçer zevk u safâ eyyâmı Ermeden nısf-ı nehârı erişür ahşâmı makālıyla gûyâ oldular. Sultân-ı müşârun ileyhâ hazretlerinin velâdet-i bâ-saʿâdetlerine Tevfîk Efendi'nin inşâd eylediği târîhdir: Şâh Sultân tâliʿ oldu müjde nesl-i Şâh'dan. (شاه سلطان طالع اولدی مژده نسل شاهدن)