Defterdar Mektubçusu hulefâsından olup, vücûdu hatt-ı Öklidis'den arak ve sadâsı müşâbih-i [M1 196] savt-ı buk olan Rahîkī dâmâdı Râcih Bey, tenâvül-i berş ile kadîd ve fart-ı hüzâl sebebi ile cism-i nahîfinden üstuhânları bedîd olup, Mahmûd Paşa Câmiʿi Mütevellîsi bulunduğundan, cumʿa günü resmen pîşgâh-ı hümâyûnda micmerekeş iken ʿillet-i nâ-tüvânî ile yere sukūt ve hâli müşevveş olduğunu Şehriyâr-ı merhamet-disâr reʾye'l-ʿayn müşâhade ile merkūmu lutf-i Şâhâne'sine sezâ-vâr görüp: “Matlabı suʾâl olunsun!” emri sâdır ve Hâcelik ve Cebeciler Kitâbeti ile mutayyebü'l-hâtır olacağı haseb-i hâlinden zâhir olup, tarîk-ı hâcegâna idhâl ve Cebeciler Kitâbeti ile makzıyyü'l-âmâl kılındı. Ramazân-ı şerîfin on beşinci günü ʿâdet-i dîrîn ve resm-i pîşîn üzere huzûrları lâzım gelen vüzerâ vü ʿulemâ ve ricâl ve ocağlu Serây-ı hümâyûn'a ʿazm ü şitâb ve Hırka-i şerîfe ʿalâ lâbisihâ efdalu't-tahiyyeyi bûsîde-i şifâh-ı âdâb eylediler.