Râmî Paşa-zâde Mustafa Bey'de cerbeze ve idâre-i umûr, meʾmûl-i Sadru's-sudûr olduğuna binâʾen, hakkında kelime-i tayyibe erzânî ve Defterdârlık ile hâyiz-i rehîne-i emânî olmuşidi. Meʾmûl derecesinde mûmâ ileyhden hidmet rû-nümâ olmayup, mîrî tahsîlâtı berhem-zede-i habt ü halel ve umûr-i istîfâ bi'l-külliyye muhtel olmağla, evâsıt-ı Şaʿbânda ʿazl ve hânesinde ikāmeti irâde ve Baş-defterdarlık, bu defʿa dahi Reʾîsülküttâb-ı esbak ʿAbdî Efendi'de karâr-dâde oldu.