Müşârun ileyhin fevti haberi hâricde şâyiʿ olmazdan mukaddem sâbıkā Sadrıaʿzam Kethudâsı ve el-yevm Matbah Emîni olan Bekir Efendi, Sadrıaʿzam ziyâretine varup, hilâl-i sohbetde: “Efendim ihrâz-ı rütbe edenlere Matbah Emîni olmak ve dîvân yerinde ahâd-ı nâs misillü bi'z-zarûre irtikâb-ı mezellet-i hidmet etmek beşeriyyet hasebiyle nefse girân gelüp, Devlet-i ʿaliyye'ye dahi mûcib-i şeyn olduğu zâhirdir” dedikde, Sadrıaʿzam: “Vâkıʿâ öyledir hattâ biz re'îs olduğumuzda bunları hep fikr ü mülâhaza etdik ve nâçâr Vezâret'le ihtiyâr-ı gurbet eyledik. ʿUluvv-i himmet ashâbı ve menâsıb-ı refîʿa erbâbı fi'l-hakīka evc-i rifʿatden hazîz-ı zillete sukūtunu istemez, sizin Vezâret'e meyl ü rağbetiniz var ise Haleb Vâlîsi Sadr-ı esbakın şimdi vefâtı haberi geldi, kerâmetlü Pâdişâh'ımızdan recâ ve sizi Vezâret'le Haleb Vâlîsi etmeğe teʿahhüd ederiz” dediklerinde dâmenine ruhsâ ve Vezâret ihsân olunmak bâbında dest-bâz-ı niyâz u istidʿâ olup, o gün mâdde ʿâlem-i bâlâya ifâde ve Vezîr-i Müşterî-tedbîrin telhîsine müsâʿade olunup, Efendi-yi mûmâ ileyh kapuya daʿvet ve Haleb Eyâleti inzımâmıyla dûş-i istihkākına ilbâs-ı ferve-i Vezâret kılınup, bu sebeble karîn-i inhilâl olan Matbah Emâneti, Tavîl İbrâhîm Bey'e intikāl eyledi. Bu muhâvereden sonra Matbah Emâneti, Sadâret-i ʿuzmâ Kethudâlığı'ndan munfasıl İbrâhîm Bey'e tevcîh olunması ve der-ʿakab tenâkuz-i irtikâbı garâyib-i rûzgârdandır. ʿUbûdiyyet iktızâsıyla ednâ vü aʿlâ hidemât-ı Devlet-i ʿaliyye'de ʿale's-sevâ ise dahi ihrâz-ı merâtib-i ʿuzmâ edenlerin rütbe-i asliyyelerine hürmet olunagelüp, rütbelerinden dûn hidemâtda bulunmaları, iʿtibârât-ı asliyyelerine îrâs-ı hevân ü mezellet etmeyeceği zâhirdir.