Müşârun ileyh Kerküklü Vezîr firârî Hasan Paşa'nın mahdûmu olup, mürûr-ı zemân ile tahsîl-i kābiliyyet-i merâtib ve Silahşörlük ve Kapucu-başılık ile temhîd-i mukaddime-i menâsıb eyleyüp, bi'l-fi'l Kapucular Kethudâlığı ile tırâzende-i câme-i istiʿdâd ve elli bir senesi muharreminde Mîrahûrluk ile esb-süvâr-ı murâd ve baʿzı cesîm hıdemâta me'mûriyyetle neşîde-i iʿtibârı müstezâd olmuşidi. Elli sekiz zilhicce- sinde câh-ı Vezâret'le Kıbrıs Eyâleti, ber-vech-i mâlikâne ʿuhdesine ihâle ve elli dokuz zilkaʿdesinde senevî yüz yirmi bin guruş mîrî ile Rakka Eyâleti'ne inâle olunmuşiken, bir mâh mürûrunda baʿzı mülâhazaya binâ'en, tekrâr Kıbrıs ibkāsıyla kâmkâr olup, altmış rebîʿulevvelinde Aydın mansıbı ile çeşm-i ibtihâcı takrîr ve Sadâret'le tevkīr olunması müstenedi olan Dârü's-saʿâde Ağası tarafından tezkîr olunmuşidi. Kāyim-makām nasbından tabʿ-ı hümâyûna fütûr u melâl geldiğinden, hufyeten tarafına Hasekî irsâl olunup, beş on âdem ile Âsitâne'ye ilkāy-ı rahl ü vusûl ve altmış şaʿbânın on altıncı günü huzûr-i hümâyûnda ruhsat-yâb-ı kıyâm ü müsûl olup, mühr-i hümâyûn yed-i kifâyetine tevdîʿ ve serâsere duhte-i ferve-i semmûr ile kadr u iʿtibârı terfîʿ olundu. Üç sene kadar mesned-i Vekâlet'de kâffe-i aʿmâlini emzice-i nâsa tevfîk eyleyerek kâr-fermây-ı enâm ve imtidâd-ı vakt ü zemânı araza-i şecere-i istikrâr u devâmı olup, altmış üç saferinin ikinci günü Sadâret'den ʿazl ü infisâl ile bi-tarîkı'n-nefy Rodos'a irsâl olunmuşidi. Baʿdehû Mısr-ı Kāhire ve Rakka ve Diyârbekir eyâletlerinde hüsn-i [M1 195] siyâsetle imrâr-ı rüzgâr ve Haleb Vâlîsi iken ʿazm-i dâru'l-karâr eyledi. Müşârun ileyh kemâl-i hilm ile muttasıf ve her şahsa nevâziş ü iltifât ile mü'telif, meʿârif-âşinâ ve kâr-âzmâ bir düstûr-i vakūr idi.