Sirke ʿOsmân Paşa-zâde Mustafa Bey, devr-i Mahmûd Hânî'de rütbe-i Mîr-i mîrâniyle behredâr ve baʿzı menâsıbda geşt ü güzârı sedd-i sülme-i zarûretine medâr olmuşidi. Bu esnâda rûy-i mansıbdan mahrûm ve Edirne'den İstanbul'a kudûm ile Şekerciler Hânı'nda bî berk ü nevâ muntazır-ı ʿinâyet-i Kayyûm olup, kemâl-i iztırâb u fakrı âsumân-ı saltanatın bedri olan Pâdişâh-ı ʿâlem-penâha maʿlûm olmağla, hakkında merhamet-i Şâhâne erzânî ve üzerinde olan rütbe-i Mîr-i mîrânî refʿ olunup, Kapucular Kethudâlığı'yla nâyil-i re'sü'l-mâl-ı emânî olup, esbâb-ı dîvânî ve hâne ve esâs misillü levâzım-ı servet ü sâmânı ihsân-kerde-i hazret-i Cihânbânî olmağla, fi'l-cümle kayd-ı iflâsdan rehyâb-ı necât ve müddet-i medîdeden berü çekdiği zarûret ve tezâyuk, hakkında mü'eddî-yi hüsn-i mükâfât oldu.