Üç defʿa Defterdâr-ı Şıkk-ı Evvel olan el-Hâc Ahmed Efendi'nin nâsıye-i hâlinde be-dîdâr olan mehâyil-i rüşd ü sedâd ve emârât-ı ʿadl ü dâd-ı Vezâret'le çırâğ olmasına kuvvet-i istiʿdâd verüp, cumâdelûlâ gāyetinde kapuya daʿvet ve dûş-i istîhâli hılʿat-i zerbeft-i Vezâret'le pür-zîb ü zînet kılınup, Defterdârlık mansıb-ı refîʿi, Defter Emîni Râmî Paşa-zâde [M1 192] Mustafa Beyefendi'ye tevcîh ü ihsân ve Emânet-i Defter-i Hâkānî ile Re'îsül'küttâb-ı sâbık ʿAbdullah Efendi'nin mir'ât-ı kalbinden izâle-i gubâr-ı ahzân kılınup, Zimmet Halîfesi İbrâhîm Efendi'nin dahi baʿzı kusûruna intikāl ve müntehâ-yı hudûd-i Bosna'da vâkiʿ Bihke Kalʿası'na menfiyyen irsâl olundu. Efendi-yi mûmâ ileyh bedreka-i meşʿal-i tevfîk ile yevmen fe-yevmen münevver-sâz-ı gayheb-i hâl ve giderek Defterdârlık ve Sadâret Kethudâlığı ve vefâtından iki üç sene mukaddem Vezâret'le mahsûd-i emsâl olmuşidi.