Bosna Vâlîsi Vezîr Mehmed Paşa'dan Bosna ehâlîsi bess-i şekvâ ve cevr u zulmünden bîzâr olduklarını inhâ etmeleriyle Bosna'dan maʿzûl ve refʿ-i Vezâret ve Resmo'da ikāmetle mahzûl oldu. Târîh-i mezbûrda mülâzimân-ı Dergâh-ı ʿâlî'nin bir kıst mevâcibleri ihrâc ve kabzına me'mûrların hemyân-ı emânetine idrâc olunup, devr ʿakabinde Hazînedâr-ı hazret-i Şehriyârî'yle şeref-vürûd eden teşrîfât-ı seniyye, Sadrıaʿzamı ser-germ-i bâde-i inbisât ü ibtihâc eyledi. Silahdâr-ı hazret-i Şehriyârî, dâyire-i fâhire-i Mülûkâne'den mehcûr ve muʿtâd olan taʿyînât ile kalb-i münkesiri mecbûr kılınup, tahtında bulunan Hâfız Ahmed Ağa, Silahdârlık câh-ı bülendiyle manzûr oldu. Cezâyir Eyâleti'den vâkiʿ Tilmisan'da mîr ve fart-ı şecâʿatle şöhret-gîr olan Hasan Bey'i emsâli olan şehbâzlar iftirâs eyleyeceklerini merkūm ihsâs eyleyüp, firârdan gayri çâre bulamadığından, Büyük İspanya tarafına geçüp, bir müddet ikāmetden sonra Anabolu'ye vazʿ-ı raht-ı ikāmet ve andan sûy-i Âsitâne'ye tahrîk-i sükkân-ı ʿazîmet edüp, lede'l-vusûl [M1 193] hâl-i pür-melâlini ifade ve isticâre ile niyâz-mend-i lutf-i ʿâlem-şümûl olup, hakkında lutf-i Şâhâne mebzûl ve Donanma-yı hümâyûn sefâyininden birine kapudan nasbı ile nâyil-i eʿazz-i me’mûl olduğunu Cezayirlü tahkīk ve hakkında tertîb-i mukaddimât durûğ u tezrîk eylediler ise dahi iltifât ve tasdîk olunmayup, sâye-i devletde müstazill ve giderek merâtib-i devlet-i ebed-müddeti ihrâz ile umûrunda müstakil ve Sadrıaʿzam iken civâr-ı Hakka müntakıl oldu. Şehriyâr-ı kerâmet-elîf, Sadrıaʿzam kullarını mahzâ taltîf irâdesiyle Paşa-kapusu'nu teşrîf buyuracağları haberiyle sâmia-i Asafî teşnîf kılınup, derhal levâzım-ı ziyafete ibtidâr ve kudûm-i Şehriyâr-ı bedîʿu'l-âsâra medd-i târ-ı intizâr etmişidi. Cumâdelâhıra gurresinde biniş tarikıyla Paşa-kapusu'na sâye-endâz-ı iclâl ve resm üzere îfây-ı şart-ı istikbâl birle ʿArz Odası'nda istilkā ve temâşây-ı bâzendegân ve istimâʿ-ı hânendegân ile kesb-i zevk u safâ buyurup, tenâvül-i etʿime-i nefîse ʿakabinde sudûr-i vâlâ-makām tarafından tefârîk-ı vâfire ve cevâhir-i zâhire takdîmiyle resm-i ʿubûdiyyeti itmâm ve ahşama karîb şevket ü dârât ile Serây-ı bihişt-âsâlarına ʿatf-ı zimâm-ı ʿizz ü ihtişâm buyurdular.