İstanbul Kazâsı'nda icrây-ı ahkâm ile pesendîde-i zâhir-bînân-ı ʿavâm olan ʿIvaz Paşa-zâde İbrâhîm Beyefendi'nin müddeti, resîde-i [M1 191] hayyiz-i hıtâm ve Sâlih-zâde Efendi makāmına kıyâm ile mazhar-ı ikrâm-ı Pâdişâh-ı enâm oldu. Bozca-ada'da ve sâyir mahallerde mübtelây-ı gurbet ve dâne-çîn-i kısmet olan sâbıkā Hazîne Kethudâsı ve Mâliyye Tezkirecisi Yenişehirli Mehmed Efendi ve Seyyid Hâşim Efendi ve Üsküdar Monlası Hamîdî Efendi, mazhar-ı ʿafv ü işfâk ve üçü birden ıtlâk olundu. Rumeli Vâlîsi Vezîr Silahdâr Mehmed Paşa'nın Âsitâne'ye gelmesi bundan akdem tarafına ifâde ve evâsıt-ı rebîʿde kurb-i İstanbul'a resîde olduğu ihbâr olunup, taraf-ı Sadrıaʿzamî'den Dâvud Paşa Kasrı'nda yemeklik âmâde kılınup, tenâvül-i mâ-hazar ve Paşa-kapusu'na gelüp, resmen kürk ve müzeyyen esb ile ikrâmdan sonra Serây-ı Sultânî'yi makarr eyledi. Diyâr-bekir Vâlîsi Vezîr Çeteci ʿAbdullah Paşa, birkaç gün haste olup, derdine dermân bulamadığından, mağlata-yı dünyâdan ferâğat ve ihtiyâr-ı semt-i ahiret eyledi. Eyâlet-i Diyâr-bekir, Sivas Vâlîsi Zâreli-zâde Vezîr Feyzullah Paşa'ya ve Sivas Eyâleti, Yeni-il Voyvodası olan Çapar-zâde Ahmed Bey'e Mîr-i mîrânlık ile tevcîh olundu. Müteveffây-ı müşârun ileyh iʿmâl-i Diyâr-bekir'den Çermik nâm kasabadan zuhûr edüp, bülûğ-ı rüşd ʿakabinde rükûb ü nüzûle meyl ile İran seferlerinde kesb-i irtifâʿ-ı şân ve vüzerâya Levend Baş-ağalığı edüp, giderek sît-ı şecâʿati velvele-endâz-ı mesâmiʿ-i İrâniyân olup, o hilâlde Mîr-i mîrânlık ile celb-i mezîd-i rifʿat ve çok geçmeden nâyil-ı rütbe-i Vezâret olmuşidi. Vâlî olduğu eyâletlerde sît-ı ʿadli resîde-i ʿanân-i semâ ve bâ-husûs Mîr-i Hâclığında ʿUrbân eşkıyâsıyla vukūʿ bulan muhârebesi ilâ yevminâ hâzâ dillerde dâstân olmuş bir maʿnâ olduğundan gayri, ne mahalle varsa livâsı mansûr ve aʿdâsı müste'sıl ü makhûr olup, meʿârif u edebden dahi behre-ver ve Tertîb-i Zîbâ misillü tasnîf eylediği kitâb erbâbı beyninde haylî muʿteber olup, cevdet-i hattı meşhûr ve vardığı memleketlerde celî hat ile manzûr olan âsârı hüsn-i hattına şehâdet eyliyeceği zâhir ve gayr-i mestûrdur.