ʿAbdulkerîm Paşa'nın fıkdânı sebebiyle Deryâ Kapudanlığı münhal olup, mücerribân-ı Devlet-i ebed-bünyân'dan birine tevcîhi havâlî-gerd-i zamîr-i Pâdişâhî olup, hâlâ Büyük Mîrahûrluk ile müftehir u mübâhî ve rüşd ü sedâdı resîde-i hayyiz-i gāyet ü tenâhî olan Mustafa Ağa'ya, rebîʿulevvel gurresinde Vezâret ihsân ve deryâya kapudan kılındı. Büyük Mîrahûrluk ile Kapucular Kethudâsı olan Seyyid Mehmed Ağa mümtâz ve Hezârfen Kara Mustafa Ağa'nın Kapucular Kethudâlığı'yla beyâz-ı subh-i iʿtibârı zıyâ-perdâz oldu. Hazîne Kethudâsı olan Velî Efendi, Baş-muhasebe ile çırağ olmuşiken, sekiz gün mürûrunda Haremeyn Muhasebecisi Seyyid Hâşim Efendi'nin Evrâk-ı Kalem'den, ziyâde harc taleb eylediği şöhret-gîr ve ʿazl ve nefy tarîkı ile Bozca-ada'ya tesyîr olunup, ʿAvnî Efendi, Baş-muhasebe ile ser-efrâz ve Velî Efendi Haremeyn Muhasebeciliği ile nevâsâz-ı baht-ı nâ-sâz oldu. Darb-hâne Nâzırı Halîl Efendi, nakd-i ʿömrünü nihâde-i tahte-i merg ve nâtık u sâmitini cânib-i mîrîye terk eyleyüp, lüceyn-i iʿtibârı mihek-zede-i iltifât-ı Tâcdârî olan Sıdkı Efendi, Darb-hâne Nezâreti'yle nâyil-i kusvây-ı emânî ve Tersâne Emâneti ile sâbıkā Silahdâr Ağası Mehmed Bey, pâ-nihâde-i merkez-i kâmrânî oldu. Fenn-i dâd ü sitedde yektâ ve meydân-ı tefavvuk olan Tâhir Ağa, taraf-ı hümâyûna kesb-i ihtisâs ve teʿalluk eylediğine binâʾen, Ayasofya Tevliyyeti ve Kuyumcu-başılık ile necm-i ikbâli tevakkud ve teʾelluk eyledi. Hulûl-i sermâ ve bürûdet-i hevâ cihetleriyle Sâhil-serây-ı Karaağac'dan istiğnâ hâsıl ve işbu şehr-i rebîʿde Serây-ı hümâyûn, neşîmengâh-ı Şehriyâr-ı ʿâdil oldu.