Donanma-yı hümâyûn kalyonlarından Kapudâne kalyonu, İstanköy pîşgâhında lenger-endâz-ı istikrâr iken, kapudan ve baʿzı zâbitân edây-ı salât-ı cumʿa içün câmiʿa ʿazîmet edüp, sefînede bulunan üserâ neferâta gālib olmalarıyla muhârebeye mübâşeret ve ekserine izâka-i şerbet-i şehâdet eyledikleri hâlde rûzgâr dahi ziyâdece hübûb etmeye başlayup, tîmûr sürüyerek açıka çıkdıkda, zikr olunan esirler yelken açup, engine doğru teveccüh eylediklerini [190] Kapudan Paşa ve Kapudâne Bey müşâhede ile âhar sefîneye süvâr ve alarga oluncaya dek imdâd-ı rüzgâr-ı şedîd ile sefîne-i mezkûre gözden nihân olup, bir vechile taʿkīb edemediklerini Der-i devlet-medâr'a işʿâr etmişler idi. Mûmâ ileyhimâ terk-i şerîta-i ihtiyât ile sefîneyi neferât-ı kalîle ile bırakup, seferber iken câmiʿ behânesiyle tervîh-i nefs-i emmâreye şitâb ve bu sûret-i nâdiru'l-vukūʿ ile Devlet-i ʿaliyye'yi şeyn-i gaflet ile mevzûʿ-bahs-i aʿdâ vü ahbâb etdikleri Şehriyâr-ı vâlâ-cenâbı igzâb edüp, ikisinin dahi katline irâde-i kâtıʿa-i Cihânbânî teʿalluk edüp, evâyil-i cumâdelûlâda hükm-i Cihân-mutâʿ-ı Sultânî [M1 190] icrâ ve ru’ûs-i maktūʿaları gelüp, halîde-i güzergâh-ı aʿlâ vü ednâ kılındı.