Sâl-i mezkûr muharremü'l-harâmı ibtidâsında Bosna Eyâleti, Vezîr Muhsin-zâde Mehmed Paşa'ya tevcîh olunup, Kütahya'dan hareket ve Âsitâne-i saʿâdet'e gelüp, halîle-i celîleleri Sultân hazretlerinin seraylarında birkaç gün istirâhat eylemeleri tarafına telmîh u işâret ve münhal olan Anadolu Eyâleti, Tevkīʿî Vezîr Mustafa Paşa'ya ihsân olunup, kendüsü Nişancılık ile [M1 187] Âsitâne'de ikāmet ve mütesellim ile zabt-ı mansıb etmek üzere tahsîl-i ruhsat eyleyüp, sâbıkā Bosna Vâlîsi Vezîr Mehmed Paşa'ya, şimdilik Yanya Sancağı ʿinâyet olundu. Erbâb-ı zeʿâmet ve tîmâr Devlet-i ʿaliyye'nin iʿtinâ eyleyeceği askerden oldukları zâhir u âşikâr iken, temâdî-yi eyyâm-ı esfâr sebebi ile âzmâyiş-i kâr-ı zârdan ekserîsi pâ-keşîde-i ferâgat ve âsûde-nişîn mastebe-i betâlet olup, içlerinde iʿmâl-i seyf ü sinân ve idâre-i şemşîr ü kemân eder ekall-i kalîl ve sefer zuhûrunda ednâ şiddet-i muhârebeye sabr u tehammül edemeyüp, gûyâ hel min sebîl olacağları vâreste-i ityân-ı delîl olmağla, fî-mâ-baʿd o makūleler teʿallüm-i ceng ve remy-i tüfeng ve âzmâyiş-i tîr ve darb-ı şemşîr vâdîlerini erbâbından görmeğe ihtimâm eylemeleri bâbında ısdâr-ı ahkâm olundu. Mâh-ı mezbûrun on dördüncü günü sunûf-i ʿasâkirin müstehak oldukları mevâcib tertîb olunan dîvânda kabzına me'mûrlara edâ ve devr ʿakabinde Hazîne Kethudâsı Teşrîfât-ı hümâyûn getürüp, vech-i lâyıkı üzere hidmeti iʿtâ olundu.