Çatladı-kapu semtinde vâkiʿ bir vîrânede zemân-ı kadîmden kalmış üç kıtʿa ve Sultân Bâyezîd Câmiʿi'ne karîb Parmak-kapu semtinde iki kıtʿa musaykal ve mevzûn sütûn bulunup, müceddeden inşâsı irâde olunan câmiʿ-i şerîfe lüzûmu mütebeyyen olduğundan, sanʿat-ı cerr-i eskāl ile câmiʿ-i mezkûr sâhasına nakl ü îsâl ve emr-i binâda yüsr ü sühûlet emâreleri istidlâl olundu. Lağamcı-başı sanʿatını icrâ içün bir mahal tahsisini recâ eylediğine binâʾen, Kağıd-hâne Kazâsı tahsîs ve seyr ü temâşâya şâyeste olduğu Sadrıaʿzam tarafından telhîs olunmuşidi. Lâzime-i lağam mahalline taʿbiyye ve temâşâ içün mekân tesviye olunduğu ihbâr olunduğuna binâʾen, zilhicce evâhırında Hakān-ı cihân Kağıd-hâne Kazâsı'nı, kudûm-i Şâhâne'leriyle reşk-sâz-ı sahn-ı cinân eylediklerinde lağama âteş ilkā ve sanʿatlarını kemâliyle icrâ ve lağamcı-başı ve sâyire bahşişler iʿtâ olundu.