Sâbıkā Cerde Başbuğu ve hâlâ Karaman Vâlîsi olan Vezîr ʿAbdurrahmân Paşa, şedîdü'ş-şekîme ve sâhib-i dâyire-i ʿazîme olup, Konya halkı mutâlebât-ı ʿanîfesiyle halîde-pây-ı vahl-i iztırâb olduklarından, birkaç defʿa ʿarz-ı hâlleriyle taʿcîz-i ricâl-i bâb eyledikleri maʿrûz-i rikâb-ı kamer-tâb kılındığına binâʾen, Vezâreti refʿ olunup, memleketinde ikāmeti içün Kapucu-başı taʿyîn ü irsâl ve yedine misâl-i lâzimü'l-imtisâl verilmişidi. Mûmâ ileyh Konya'ya varup, emr-i ʿâlîyi ibrâz eyledikde, müşârun ileyh izhâr-ı nefret ü işmiʾzâz ve mûmâ ileyhi habs edüp, Konya'dan hareket ile Âsitâne tarafına turktâz eylemişidi. Mâyil-i fesâd olan baʿzı evbâş ve evgād ictimâʿıyla sevâd-ı cemʿiyyeti izdiyâd bularak ceyş-i kesîf ile Bolu'ya doğru vusûlü hadşe-resân-ı kulûb-i erkân olup, encâm-kâr birkaç defʿa muhâbere ve terhîb ile maskat-ı re'si olan Dârende'de ikāmetine nizâm ve yollarda başında olan haşerât-ı nâsı tefrîk eyleyerek Dârende'ye varup, muntazar-ı lutf-i Pâdişâh-ı Dârâ-gulâm olduğunu tahrîr ü iʿlâm eyledi. Baʿzı sikadan mervîdir ki, Şehriyâr-ı zemân hazretlerinin baʿzı umûrda ısrârı nümâyân ve Sadr-ı vakt bulunan Râgıb Paşa bu cihetle velhân olup, kasd-ı ihâfe ile ʿAbdurrahmân Paşa'ya haber ibʿâs ve Bolu'ya doğru teveccühünü ihsâs ile mûcib-i [M1 186] ıztırâb olacak hîle-i felsefiye îrâs eyleyüp, ʿâkıbet müşârun ileyhin sevretini yine kendüsü teskîn ve Dârende'de cüz’î ikāmetden sonra rütbe-i Vezâreti ibkā olunacağını sırran tarafına ifâde vü tebyîn eyledi. Münhal olan Karaman Eyâleti, Sadr-ı esbak Saʿîd Mehmed Paşa'ya ve Mısr-ı Kāhire, Vezîr Kâmil Ahmed Paşa'ya; ve Cidde Sancağı, Sadr-ı esbak Vezîr Mustafa Paşa'ya tevcîh ü ʿinâyet ve Cidde Vâlîsi Vezîr Saʿdeddîn Paşa, Şâm tarafına çıkup, vusûlü haberi karʿ-ı sâmiʿa-i devlet eyledikde, hâline çespân bir mansıb ihsân olunacağı tarafına tahrîr ü işâret olundu.