Müşârun ileyh birkaç günden berü münharifü'l-mizâc olup, ʿilleti kabûl-i ʿilâc etmediğinden, işbu Cumâdelâhire'nin yirmi sekizinci gicesi deryâ-yı bî-gerân-ı ʿâlem-i fânîden lâ-ʿâsıme'l-yevm min emrillâh mekāliyle gûyâ olarak refʿ-i raht-ı vücûd ve ʿazm-i semt-i bekā [M1 179] ve hulûd edüp, Sadrıaʿzam ve Tevkīʿî Mustafa Paşa ve Kapudan Paşa ve sudûr ve Nakībü'l-eşrâf ve İstanbul Kadısı ve Ocak ağaları ve Defterdar Efendi, Sultân Mehmed Câmiʿi'nde cemʿ olmalarıyla Ayasofya Şeyhi'ne iktidâ ve namazı edâ olundu. Sâbıkā Sadr-ı Rûm Veliyyüddîn Efendi, mesned-i vâlâ-yı fetvâya cümleden elyak u ehak görülüp, Sadrıaʿzam mukaddemce Serây-ı hümâyûn'a ʿazîmet ve Efendi-yi müşârun ileyhi Kapucular kethudâlarıyla daʿvet etmişler idi. Beş on günden berü mizâclarına inhırâf târî olup, rükûb u nüzûle kudretleri olmadığını beyân ve bu ʿinâyet-i bî-pâyân sebeb-i ber’-i cism-i nâ-tüvânî olduğunu güzârende-i zebân eylediği ʿarz-ı huzûr-i Şehriyâr-ı devrân kılındıkda, cism-i bî-mârlarına sıhhat ve vücûd-i bî-tâblarına kuvvet gelinceye dek hânelerinde râhat etmeleri irâdesiyle ferve-i beyzây-ı Meşîhat boğça ile taraflarına irsâl olunup, bu teşrîf-i gayr-i mesbûk ile kavmi beyninde hâyiz-i rehîne-i mefharet oldu. Şifâ-bahş-ı bîmârân olan cenâb-ı Müsteʿân yevmen feyevmen müşârun ileyhin cism-i ʿalîline tâb ü tüvân verüp, ʿilleti sıhhate mübeddel olarak defʿ-i emrâz u ʿilel eylediğini taraf-ı Sadru's-sudûra ihbâr ve on yedi gün sonra Rikâb-ı hümâyûn'a vazʿ-ı cebhe-i meskenet ü iftikār eyledi.