Dü çîz hâsıl-ı ʿömr est hayr u nâm-ı nikû / Ez-în çû der-güzeri küllü men ʿaleyhâ fân. mefhûmu üzere dünyâ fânî ve âsâr-ı hayriyye insana ʿömr-i sânî olduğundan başka, igrâz-ı zâyile-i dünyâ resîde-i hayyiz-i fenâ ve vücûh-i müberrât ve istınâʿ-ı hayrât tûşe vü zâd-ı ʿukbâ olduğu maʿlûm-i Pâdişâh-ı Felâtûn-ârâ olduğuna binâʾen, ibtigā-i merzât-ı Bârî ve temennâ-yı lütf ve âmurziş-i cenâb-ı Kird-gârî zımnında bir câmiʿ-i latîf ve bir maʿbed-i şerîf binâsına meyl ü rağbet ve hadîs-i men benâ lillâhi mesciden benâllâhü lehû beyten fi'l-cenneti medlûlünden hâsıl olan teşrîfin iktisâbına himmet buyurup, Âsitâne-i saʿâdet'de Lâleli çeşme kurbunda vâkiʿ ʿÂrif Efendi bostanını ve civârında vâkiʿ baʿzı büyût ve dekâkini tayyibe karîb emvâlden iştirâ ve ashâbını sunûf-i ihsân ile irzâdan sonra Sâliha Sultân Kethudâsı Kapucu-başı ʿAli Ağa'yı Emîn-i binâ nasb etmişler idi. Bir resm-i dilkeş ve pür-nemâyiş istihrâcı Mimâr Ağa'ya sipâriş olunup, mûmâ ileyh dahi cell-i gayretini sarf ve her tarafı keşf ile birer resm-i hoş âyende tarh u rasf edüp, ʿarz-ı huzûr-i Âsaf-ı deryâ-dil ve resm-i mezkûr bâdî-yi nazarda Sultân Selîm Câmiʿi'ne müşâbih ve muşâkil olduğundan mevkiʿ-i pesend ü tahsîne mütevâsıl olup, Miʿmâr Ağa hilʿat-i pûş ve ihrâc-ı resmde hem-dûş-i murâfakat olan beş nefer miʿmârân dahi câm-ı iltifâtdan curʿa-nûş oldular. Resm-i mezkûr fi'l-hâl ʿarz-ı huzûr-i lâmiʿu'n-nûr kılınup, tarh u heyʾetini câmiʿu'l-ʿadl ve'l-ihsân olan Hâkān-ı zemân istihsân ve o vechile binâya şurûʿ olunmasını emr ü fermân buyurmuşlar idi. Şaʿbânü'l-muʿazzamın yirmi üçüncü günü ihtiyâr olunan vakt-i mersûdetü's-saʿâdâtda hafr-ı esâsa kasd ü niyyet ve mukaddemce ihzâr olunan Ayasofya Şeyhi mihrâb vazʿ olunacak mahalde duʿâya mübâşeret ve hıtâmında Şeyh-i mûmâ ileyh teberrüken mahall-i mezkûre darb-ı fe's-i himmet edüp, ʿâdet-i dîrîn üzere zebh-i karâbîn ve iğnâ-yı fukarâ vü mesâkîn ile celb-i havâtır ve istihsâl-i duʿâ-yı mütekâsir kılındı.