İrâde-i cenâb-ı Kahhâr-ı Lem-yezel ile diyâr-ı Şâmât'da zelzele zuhûriyle o taraf sükkânını mübtelây-ı iztirâb ve vecel edüp, mahrûse-i Şâm'da vâkiʿ Emeviyye Câmiʿiyle minâre-i beyzâ münhedim ve Şâm Kalʿası'nın ekser mahalleri rahnedâr ve münselim olduğundan başka vâfir cevâmiʿ u mesâcid ve büyût ve meʿâbid müşrif-i harâb ve tûde-i türâb olduğu o tarafdan maʿrûz-ı ʿatabe-i felek kıbâb kılınmağla, Dergâh-ı ʿâlî Kapucu-başılarından Fazlı Paşa-zâde Mustafa Bey, Binâ Emâneti'ne intihâb ve havâleten elli bin guruş verilüp, taʿyîn olunan miʿmârları istishâb ile o tarafa tahrîk-i rikâb eyleyüp Sayda Kalʿası dahi sâhil-i bahre mücâvir ve taʿmîrinde [M1 178] ihmâl şart-ı ihtiyâta mugāyir olup, Sayda malından on bin guruş havâle ve vâlî ve vücûh-i belde maʿrifetleriyle bir kadem-i akdem yapılması zimnında cümleye hitâben irsâl-i kıbâle kılındı.