İstanbul Kadılığı'nda ikdâm ü gayreti meşhûd ve taraf-ı hümâyûndan ʿatıyye vü ihsân ile mahsûd olup, çok geçmeden Anadolu Pâyesi'yle mesrûr ve mülhak-ı bi's-sudûr olan Bekrî-zâde Halîl Efendi, işbu cumâde'lâhıranın ikinci günü terk-i dâr-ı garûr ve mücâvir-i ehl-i kubûr olup, makāmıyla sâbıkā İstanbul Kadısı ve Anadolu Pâyesi olan ʿİvaz Paşa-zâde İbrâhîm Bey nâyil-i etemm-i hubûr oldu. Müteveffâ-yı müşârun ileyhin vukūf-ı derecelerinde icmâl-i hâli mukaddemâ güzârende-i zebân-ı beyân olup, iʿâdesinde tibâʿ-ı nâsa kelâl ve mâyil-i îcâz u ihtisâr olanlara fütûr u melâl ʿârız olacağı baʿîdün ʿani'l-ihtimâl olmadığına binâʾen, o kadarla iktifâ ve hayru'l-kelâmi mâ kalle ve delle mesleği ihtiyâr ve ictibâ olundu.