Kasım-paşa'da vâkiʿ debbağhâne erâzili birkaç fâhişe ʿavret isticlâb ve kalyoncular kazıyyeye vukūf ile ʿavretleri almağa hücûm u şitâb ve tarafeyn muhârebeye mübâşeret ile teksîr-i sevâd-ı cemʿiyyet eyledikleri sâmiʿa-res-i evliyây-ı devlet olup, fi'l-hâl Bostâncı-başı ve sâyir zâbitân üzerlerine havâle ve muhâreşe vü münâveşeleri izâle olunduğundan gayri, mü'eddî-yi nizâʿ ve bâʿis-i sudâʿ olan eşhâsın baʿzılarına eşedd-i taʿzîr ve baʿzılarına havâle-i şemşîr tedmîr olundu. Bundan akdem muhâlefet-i hükm-i kānûn ile meyl-i râhat ü sükûn ve tahrîk-i gazab-ı Pâdişâh-ı rubʿ-meskûn eden kapucular Yedi-kulle'de mescûn olmuşlar idi. Rakdet-i gafletden bîdâr oldukları tebeyyün ve fîmâ baʿd hidmetlerinde tehâvün etmeyecekleri teʿayyün eylediğinden sebîlleri tahliye ve çirk-i seyyi'eleri sâbûn-i ʿafv ile tenkīh olundu. ʿÂmm-ı mâzîde Surre Emîni nasb olunan Yazıcı İbrâhîm Efendi, baʿde'l-hacc vâsıl-ı diyâr-ı Şâm ve birkaç gün mübtelây-ı âlâm-ı eskām olup, bu günlerde vefât ve redd-i vedîʿa-i hayât eyledi. Düvel elçilerinden biri ʿatebe-i felek-mertebeye vazʿ-ı cebîn-i tefhîm ve nâmesini teslîm niyâzında olduğuna binâʾen, Dîvân-ı hümâyûn tertîb ü tanzîm olunmuşidi. Yevm-i mezkûrda Kadırga Limanı'nda bir bakkal dükkânından âteş zuhûr ve bây ü gedâyı gümkerde râh-ı şuʿûr edüp, elçi münâsebeti ile Sadrıaʿzam itfây-ı harîka gitmeyüp, kethudâlarını ve Cebeci-başı ve Sekbân-başı'yı taʿyîn ve âteşi teskîn eylediler ise dahi zâbitândan birkaç âdem hedm olunan hânenin birinden sukūt ile âzârde-i zahm-ı sehmgîn oldu.