Mâlikü'l-mülk-i ʿale'l-ıtlâk olan Cenâb-ı Hâllâk'ın nevʿ-i beşere ihsân eylediği kudret ve niʿmeti mâ vuzıʿa lehûsunun gayrında istiʿmâl ile lezzât-ı dünyeviyyeye sarf ü tebzîr ve rûz u şeb seyyi'ât-ı aʿmâl ile mürtekib-i emr-i hatîr olanların ekserî seyf-i siyâsetle maktûl ve yâhûd ʿâkıbet-i hâli fakr ü iflâs hayyizine mevsûl olduğu hezâr-bâr tecribet-güzâr-ı târîh-şinâsân-ı rüzgârdır. Tercû'n-necâte ve lem teslük mesâlikehâ İnne's-sefînete lâ tücrâ ʿalʿ-yebs etbâʿ ve müteʿallikātı baʿzı tezâkir-i ʿatîka tanzîminden ve mîrîye zararı zâhir katî çok mevâdd-ı kerîhe tanzîm eylediklerinden her biri kesb-i servet ü sâmân ve hâric-i ez-hadd-i tafra vü ʿunvân peydâ eyledikleri maʿlûm olduğundan, ekseri musâdere ve habs ile te'dîb ve havane-i Beytü'l-mâl bu cihetle terhîb olundu. Vânî Hüseyin Efendi, ehass-ı mensûbâtından olup, reh-yâb-ı vâdi-yi selâmet olduğu gibi Zâhir ʿÖmer tarafına firâr ve intikām sevdâsıyla merkūmu ve Mısır ümerâsından Şeyhu'l-beled ʿAlî Bey'i varta-i halʿ-i ribka-i itāʿate giriftâr eyleyüp, devleti külliyât-ı mesârıf ile taʿcîz ü izrâra bâdî ve Zâhir ʿÖmer'in katline ve ʿAlî Bey'in izmihlâline sebeb-i ʿâdî olup, ʿâkıbet-i mezbûr dahi esve-i hâl ile helâk ve câme-i ʿömrü çâk-çâk oldu. Mâ-verây-ı takdîrde müstetir olan ahvâl zâhir olmak lâzım gelse mezbûr vaktiyle iʿdâm olunup, [M1 171] Devlet-i ʿaliyye sâlifü'l-beyân hasâret ü zarardan vâreste olur idi. Nazm: Tederraʿ li-ebnâ'izzemâni müfâzatün Ve lâ telkahüm illâ ve ente muhârib Belâ küllühüm misle'z-zemâni televvünen İzâ serra minhüm hâ'ibün sâ'e cânib Ve küntü erâ enne't-tecâribe ʿuddetün Fe-hâbet sikātü'n-nâsi hatte't-tecârib