Ferʿ-i cürsûme-i şeref ve hayru'l-halef-i urûme-i selef olan Şerîf Müsâʿid bin Saʿîd sekiz sene mikdârı Şerâfet-i Mekke ile dem-güzâr ve tevâyif-i ʿUrbân'ı zabt ile nâmdâr olup, ʿâm-ı mâzîde tüccârdan bir şahs-ı tüvanger müşârun ileyhe izhâr-ı ğayz ile îkāʿ-ı zarar fikrine düşüp, Mısır Mîrü'l-haccı Keşkeş Hüseyin Bey'e vâfir mal vaʿd ve ʿazlini taleb ve mîr-i merkūm dahi müzahrefât-ı dünyeviyyeye tamaʿan Mekke'ye vüsûlunde bir behâne ile ihdâs-ı şûr u şağb edüp, mücadeleleri mücâledeye ve muʿârazaları mübâledeye müncer olup, Harem-i Beyt-i mükerrem'de ceng ü sitîz ve i'mâl-i seyf ü nebtîz eyleyerek mücâvir ve huccâcdan emniyyet meslûb ve ʿâkıbet ceyş-i Mısrî mağlûb ve eşyaları menhûb olup, tevassut-i muslihîn ile defʿ-i gavgā ve yağmâ olunan eşyaları tahsîl ve yedlerine iʿtâ olunmuşidi. Mısır ümerâsı tarafından bu rezâlet hazm olunmayup, Şerîf Müsâʿid'in tesallutu ve Şerâfet üzerinde kalursa, Mısır huccâcının inkıtâʿı maglatalarıyla Devlet-i ʿaliyye'yi [M1 168] tevhîş ve üftâde-i hılâb-ı teşvîş eylediklerine binâʿen, ʿazl ve birâderi Şerîf Caʿfer'i Mekke'ye nasb etmeğe Mîrü'l-hâc Çeteci ʿAbdullah Paşa me'mûr ve bu mazmûnda emr-i celîlü'ş-şân şeref-sudûr olmuşidi. Vezîr-i müşârun ileyh Mekke'ye vardıkda, hatt-ı hümâyûn kırâʿeti behânesiyle cümle eşrâf ü aʿyânı cemʿ edüp, irâde-i Devlet-i ʿaliyye'yi Şerîf Müsâʿid'e ihbâr ve ol dahi semʿan ve taʿaten kelâmını tekrâr ile ʿazli ihtiyâr ve birâderi Şerîf Caʿfer Emâret-i Mekke ile behredâr-ı ʿizz ü iʿtibâr oldu.