Şehriyâr-ı meʿâlî-âsâr hey’et-i mütenekkire ile geşt ü güzâr kasd edüp, seherî Orta-kapu'ya geldiklerinde kapu muhâfazasına tahsîs olunan bir nefer bölükbaşı ile kırk nefer kapuculardan nevbet yerinde şahs-ı vâhidi bulmayup, bâb-ı mezbûr derbân u muhâfızdan hâlî bulunmağla tecessüs olundukda leyle-i mezbûrede nevbetci olmak üzere, nazm: Yâ nâyimen fi'l-leyâlî gayre müftekkirin Nebbih cüfûneke vahzir min havâdisihâ mefhûmundan bî-haber beş on nefer kapucu kendü odalarında gunûde-i pister-i râhat ve gark-ı teyyâr-ı gaflet oldukları bizzât maʿlûm-i Şehinşâhî olup, Tebdîl Hasekîsi'ni Cebeci-başı Mustafa Ağa'ya irsâl ve mûmâ ileyhin ve Baş-kethudâ'nın henûz Cebehâne'ye gelmedikleri haberini îsâl eyledikde, cemretü'l-gazây-ı gazab-ı Şâhâne ʿalevgîr-i iştiʿâl ve Cebe-hâne'de bulunan karakullukcular nevbetci bulunan kapucuları alup Paşa-kapusu'na getürmek emr-i hümâyûnuna ser-fürû-bürde-i imtisâl olup, Muhzır Ağa'ya teslîm ve mâ-cerâyı ifade vü tefhîm etmişleridi. Te'dîb ve gûşmâlleri murâd-ı Pâdişâhî olduğu maʿlûm-i Sadâret-penâhî olmağla, Yedikulle'ye habs ü tescîn ve Cebeci-başı ve Baş-kethudâ'nın teʿazzüz-i nefs iktizâsıyla, Cebe-hâne'de bulunmadıklarıyçün ʿibreten li's-sâyirîn ʿazl olunup, Cebeci-başılık mansıbına Terzi Hüseyin Ağa taʿyîn olundu.