Dergâh-ı ʿâlî Yeniçeri Ağası olan Vefâlı Mehmed Ağa, ʿahd-ı ʿOsmân Hânî'de Yeniçeri Ağası bulunup, nesîm-i müjde-i Sadâreti [M1 165] istişmâm ve hidmet beğendirmek hevâsıyla muhterife ve ehl-i sûku narh ve sâyir husûslarda tazyîk îlâm eyleyüp, Ağa-yı mûmâ ileyhin etvârından Sadr-ı vakt bulunan Bıyıklı ʿAli Paşa müsteşʿir ve vaʿd-i Sadâret'le müstebşir olduğunu müstahber olup, sû'-i hâlini ʿâlem-i bâlâya takrîr ve Ağalık'dan ʿazl ve Mağnisa'ya nefy ile tekdîr etmişidi. Râgıb Mehmed Paşa, Sadâret'le kâm-revâ oldukda, mûmâ ileyh ile İran seferlerinde mülâkāt ve biribiriyle ʿakd-i râbıta-i muvâhât eylediklerine binâʾen, birkaç defʿa Mağnisa'dan nefsini taʿrîf ve hukūk-ı dîrîneyi tezkîr ile rakam-ı niyâzı tazʿîf edüp, müşârun ileyh dahi nazm: İnne'l-kirâme izâ mâ eyserû zekerû Men kâne ye'lefühüm fi'l-menzili'l-haşîn mefhûmuna riʿâyet ve Yeniçeri Ağası nasbı ile hakkında icrây-ı şîme-i mürüvvet etmişidi. Çok geçmeden tavrını tagyîr ve dimâğında lezzeti müstekarr olan maslahatın tedbîri zımnında dâmen-i saʿy ü ihtimâmı teşmîr eylediği maʿlûm-i Sadr-ı Müsteşîrî tedbîr olup, yine hakkında muktezây-ı mürüvvet icrâ ve rütbe-i vâlây-ı Vezâret'le kadri iʿlâ olunup, Ağalı'ğa daʿvet olunan Kapu-kıran Mehmed Ağa, Belgrad'dan gelinceye dek ihtiyâr-ı meslek-i müsâhele vü igmâz ve tebeʿât-ı sabıkasından iʿrâz olunup, mûmâ ileyhin Âsitâne-i saʿâdet'e vüsûlü ʿulûfe çıkacağı giceye tesadüf eylediğinden, nasbı husūsu bi'z-zarûre teʾhîr ve Dîvân'dan sonra Kapu-kıran bu defʿa dahi Yeniçeri Ağası nasbı ile tevkīr olunup, müşârun ileyh Molla Gürânî'de vâkiʿ hânesine rû-gerdân-ı ʿazîmet ve ʿazli musammem olan Kapudân-ı deryâ Vezîr Süleymân Paşa'ya bedel olacağını cezm ile muntazır-ı peyâm-ı beşâret olmuşiken, nazm: Mâ küllemâ yetemennâ'l-mer'ü yüdrikühü Tecri'r-riyâhu bi-mâ lâ teştehi's-süfün mefhûmu üzere ahlâm ü emânîsi hebâ ve matlabına nâ-resâ olup, ihzâr olunan çekdirme ile muharremin on dokuzuncu günü Âsitâne'den tecnîb ve Midilli'ye iclâ vü tagrîb olundu.