İşbu zilhiccetü'ş-şerîfenin onuncu gicesi erkân-ı devlet Serây-ı hümâyûn'da ʿakd-i encümen-i cemʿiyyet ve tulûʿ-i fecr-i sâdıkda takbîl-i dâmen-i Şâhâne ile icrây-ı resm-i tebrîk ü tehniyet eyleyüp, Hidîv-i bahr ü berr yevm-i ʿîde mahsûs dârât-ı pür-zîb ü zîver ile Sultân Ahmed Hân Câmiʿi'ni dîdâr-ı âfitâb-ı envârlarıyla münevver buyurup, edây-ı salât-ı ʿîdden sonra Serây-ı Mülûkâne'lerini kudûm-i meymenet-lüzûmlarıyla kasr-ı huld-i berîne beraber buyurdular. Eflâk kapu kethudâlarından bir gebr-i zenîm Müslime câriyesini her bâr darb u teltîm eyleyüp, mezkûre bir-takrîb Tarabya'da olan hânesinden firâr ve Rikâb-ı kamertâba ʿarz-ı hâl sunup, ʿan-asl Müslimât'dan olup, mesfûrun pençe-i şikencesine giriftâr ve her bâr cevr ü eziyyeti ile dilfigâr olduğunu [M1 164] işʿâr etmekle mesfûr ihzâr ve Fenâr'da vâkî hânesi kurbunda salb ü berdâr kılındı. Hâcegân-ı Dîvân'dan Hâkî Efendi, bu hâkdân-ı fenâdan rihlet ve cânib-i ʿukbâya ʿazîmet eyledi. Müteveffây-ı mûmâ ileyhin kıtʿaları İbn Yemîn kıtʿalarından rengîn ve gazelleri maʿnidâr ve nemekîn olup, Defterdâr-kapusu binâ olundukda; Ketebe koysa sezâdır buna Sultân Mahmûd (كتبه قويسه سزادر بوكا سلطان محمود) târîh-i bedîʿini inşâd eylemişdir. Bu vâdîde olan mehâreti ve şiʿirde olan liyâkati maʿlûm olmak içün mukattaʿâtından bir iki kıtʿa bu mahalle sebt olundu. Şehsuvâr-ı ʿarsa-i cûd olduğun fehm eyledim İşte ben geldim efendim dergehin dîvânına İntızâr âtına çiğnetme bu hâkî bendegî Esb-i vaʿdin dizginin döndür vefâ meydânına Bîmârım efendim bu dem-i sermâda Sincâb ise ancak geyilür küremâda Kürk istemeğe havf ederim zîrâ kim Kürk ile kürek bir görülür imlâda.