Kethudâ Kâtibi olan ʿAli Efendi evâsıt-ı şevvâlde ʿazl ile tekdîr ve sâbıkı ʿÖmer Efendi, makām-ı sâbıkında takrîr olundu. Bergosî Mehmed Ağa'nın evzâʿ-ı şütür-gürbesi iktizâsıyla menfûr-i tabʿ-1 Sadru's-sudûr ve hânesinden çıkmamak te'dîbi ile ihtilât-ı ahbâbdan mehcûr oldu. Müderrisîn-i kirâmdan olup, kemâl ü maʿrifeti ke'ş-şemsi fi'l-hevâ cerr-i zâhir ve leyl ü nehâr nemek-i meclis-i Sadr-ı müstahsenü'l-me'âsir olan Haşmet Efendi hakkında dahi bezâzet-i lisân ve taʿn-1 ihvân sebebi ile nefret nümâyân olup, İstinye'de pederi sâhil-hânesinde ikāmeti tenbîh ve bu gûşmâl ile tahvîf-i her hâmil ü nebîh kılındı. Başbâkī-kulu olan Abdâl Mehmed Ağa, Mîrahûr-i Sânî Vekîli nasb ü taʿyîn ve Yahyâ Paşa birâderi İbrâhîm Bey, mûmâ ileyhe câ-nişîn kılındı. Pâdişâh-ı takvâ-penâh dâme fî ʿavni'l-İlâh hazretleri baʿzan salât-ı subhu Ayasofya Câmiʿi'nde edâ ve iskāt-ı farîza-i Hudâ eyler idi. ʿE'imme-i Ayasofya'dan Zileli ʿOsmân Efendi'nin nevbeti günü ʿale's-seher Ayasofya Câmiʿi'ni talʿat-ı hümâyûnlarıyla münevver buyurup, Efendi-yi mûmâ ileyhin kırâ'etini tahsîn ve kāmet-i liyâkatini hilʿat-i İmâmet-i Sâniye ile tezyîn eylediler. Ağayân-ı Harem-i hümâyûndan bazılarının vâkiʿ olan hıdemâtda taksîrleri serzede-i zuhûr ve kurb-i sürâdikāt-ı Saltanat'dan ibʿâdları sâyirlerine sebeb-i ihtilâc-ı sudûr oldu.