Sâbıkā Çorum Alaybeyisi Feyzullah, bundan akdem erbâb-ı tîmârın bilâ-mûcib tîmârlarını âhara 'arz ile mûcib-i gadr olduğundan gayri, hânedân-ı Çorum'dan bir mazlûmu ehl-i ʿörfe siʿâyet ve katline delâlet eylediği vâsıl-ı semʿ-i evliyây-ı devlet olmağla, Alaybeylik'den 'azl olunup, mutasarrıf olduğu nân-pâresi dahi âhara tevcîh olunmuşidi. Bu harâretle merkūm Âsitâne'ye gelüp, birkaç defʿa 'arz-ı hâl ve taʿcîzden hâlî olmadığı içün diyâr-ı âhara nefy olunup, bir-takrîb 'ıkāl-i celâdan reh-yâb ve Âsitâne-i saʿâdet'e iyâb ile kemâ-kân derd-i ser-i ricâl-i bâb olduğundan gayri, sû-be-sû güzergâh-ı Pâdişâhî'yi cüst ü cû ve yevmen mine'l-eyyâm Pâdişâh-ı enâm tebdîlen Üsküdar'a 'azîmet ve merkūm dahi ke'l-bâhisi ʿan hatfihi bi-zalfihi mefhûmu üzere Üsküdar'a şitâb ü sürʿat ve mukābele-i hümâyûnda hetk-i perde-i edeb [M1 151] ve nân-pâresini taleb ve bir takrîb güzergâh-ı hümâyûndan tecnîb olunduysa dahi taraf-ı âhardan bedîd ve isâʾet-i sâbikasın tecdîd ile mazhar-ı gazab-ı Padişâh-ı bâhirü't-te'yîd olup, fi'l-hâl şemʿ-i hayâtı itfâ ve cezây-ı mâ-yelîkı icrâ olundu. Maktûl-i mezbûrun oğlu Kadri Efendi dahi muharrik ve müfsid bir şahıs olup, sefer-i sâbıkda Sipâh Kâtibi bulunmak takrîbi ile Sipâh tâʾifesini igvâ ve Bazarcık'da tevlîd-i şûr u gavgā edüp, o dahi kantara-i pederden güzer ve maktûlen sûy-i âhirete sefer eyledi.