Müşârun ileyhin tarîk-ı hâcda olan mesârıfı resîde-i derece-i gāyet ve me'mûr olduğu hidmet, muhtâc-ı kesret-i iʿânet olduğuna binâ'en, bu defʿa taraf-ı hümâyûndan müşârun ileyhe beş yüz kîse inʿâm ve Trablus Vâlîsi dahi umûr-ı Cerde'yi ru'yetde ihtimâm eylediğinden, mikdâr-ı vâfî meblağ ile ol dahi mazhar-ı lutf-ı Pâdişâh-ı enâm oldu. Saka-başılar ʿan-asl teberdârân gürûhundan olup, rızâya muhâlif hareketleri vâsıl-ı semʿ-i hümâyûn ve bundan böyle muʿtemed hasekîlere tefvîzi irâde-i ʿaliyyeye makrûn olup, bu sâl-i meyâmin-iştimâlde teberdârân gürûhu o hidmet-i şerîfeden mehcûr ve hasekiyân bu teşrîf ile mesrûr oldu. Hayâtî-zâde Mehmed Efendi, Üsküdar Kazâsı'yla nâyil-i niʿmet-i zindegânî ve sâbıkā Kehhâl-başı Müstakīm-zâde, Galata Mevleviyyeti ile reh-yâb-ı vâdî-yi kâmrânî oldu. Hazîne Kethudâlığı'ndan nâyil-i rütbe-i Vezâret olan Hotin Muhâfızı Halîl Paşa, terk-i dâr-ı gurûr ve ʿazm-ı ʿarsagâh-ı yevm-i nüşûr eyledi. Müşârun ileyh fart-ı cûd [M1 150] ü sehâ ile Maʿan bin Zâyide'nin şöhretini şikest ve kesret-i bezl ü infâk ile Hâtem'in kadrini pest eyleyüp, îrâd-ı tabîʿîsinin vefreti ne mahalde bulunsa medâr-ı refâhiyyeti olduğundan başka hüner ü edebden dahi hisseyâb ve dârât ü ihtişâm-ı Vezâret'de mahsûd-ı ekfâ vü etrâb idi. Âsitâne-i saʿâdet'de ber-vech-i tekāʿüd mukīm ve muvâzıb-ı duʿây-ı sâhib-i dîhîm olan Vezîr Koca Bekir Paşa, mütecâviz-ı râdde-i tisʿîn ve yevmen fe-yevmen muntazır-ı yevm-i yakīn olduğuna binâ'en, bu hılâlde şîrâze-i nüsha-i vücûdu, dest-i Hâdimü'l-lezzât ile guseste-târ-ı fenâ ve verkā-yı bâlâ pervâz-ı rûhu evcgîr-i semt-i semâ oldu. Müşârun ileyh 'an-asl 'Alâ'iyye sükkânından ve dâyiresi dâru'l-feyz-i insânî ve nazar-ı ʻâtıfeti, hâcet-revâ-yı erbâb-ı emânî olan Gül Yûsuf Efendi'nin akrıbasından olup terbiye-i mûmâ ileyh ile kesb-i teʿayyün ü iştihâr ve devr-i Ahmed Hânî'de, Gümrükçü ve Çavuş-başılık ile nâmdâr olmuşidi. Sadr-ı vakt bulunan İbrâhîm Paşa, sâhib-i tercemenin tavrına dil-dâde ve Vezâret'le çırâğ olunmasını irâde edüp, taraf-ı Pâdişâhî'den haysiyyeti bi'l-müşâfehe tecribe vü ihtibâr ve Vezâret'e sezâvâr görülüp, otuz dört târîhinde Cidde'ye Vâlî ve birkaç sene ârâmdan sonra Tevliyyet-i Mısr-ı Kāhire ile kadri ʿâlî kılınmışidi. Baʿdehû mükerreren Cidde ve Mısır ve Mora ve Bosna'da icrâ-yı hükûmet ve Deryâ Kapudanlığı'yla iktisâb-ı şeref ü rifʿat edüp, Mora'da vakf-ı müstevfâ ile bir câmiʿ binâ ve Cidde-i maʿmûre'de dahi bir mekteb ve bir sebîl ve Kıbrıs'da çeşmeler inşâ ve sâyir mahallerde dahi eser-i hayrı bedîdâr ve vücûh-ı birre mâyil bir vezîr-i nâmdâr idi.