Ülke-i Kırım'da Hân olan Halîm Girây, hilm-i ifrât ile maʿrûf ve rehâvet ü betâʾetle mevsûf olduğundan gayri, ahdâs-ı evlâd ü ahfâdını o tarafa dâ'ir menâsıbda istihdâm ve merkūmlar dahi rey'ân-ı şebâb ve ʿadem-i tecribe-i hatâ vü savâb iktizâsıy- la, semt-i lehv ü taraba ıtlâk-ı zimâm edüp, giderek bu gaflet îrâs-ı fesâd ü mazarrat ve müstaʿidd-i fitne olan Nogay tâ'ifesine sebeb-i halʿ-i ribka-i itâʿat olup, Boğdan memleketinin bir kıtʿasını nehb ve o havâlîden bi'l-külliyye emniyyet-i nâsı selb eyledikleri maʿlûm-i hümâyûn olduğundan ʿazl ve Arslan Girây yerine vasl olunmuşidi. Müşârun ileyh Kırım'a ʿazîmet içün hazır olmuşiken, kabâyil-i Tatar o tarafda ictimâʿ ile Kırım Hânlığı'na Arslan Girây'ın birâderi Kırım Girây'ı ihtiyâr ve Der-i devlet-medâra ʿarz ve mahzar tesyâr eylediklerine binâ'en, teskîn-i fitne-i Tatar kasdıyla Hânlık müşârun ileyhden sarf olunup, muhtarları olan Kırım Girây'a ihsân ve memleket-i Boğdan'dan gāret olunan eşyâ bi't-temâm istirdâd olunmak içün ısdâr-ı emr-i ʿâlişân kılındı.