Öteden berü Mısr-ı Kāhire tarafından muʿayyen olan irsâliye hazînesi beher sene vakt ü zemânıyla Der-devlet-medâra gelüp, teslîm-i Hazîne-i ʿâmire olunmak ve Haremeyn-i şerîfeyne müretteb olan gılâl dahi bilâ-noksan mahallerine gönderilmek lâzım iken, birkaç seneden berü ümerây-ı Mısrıyye izhâr-ı bagy ü şikāk ve bu mürettebâtı başlarında olan haşerât-ı nâsa infâk edüp, baʿzı ʿilel-i bâride îrâdı ile hazînenin nısfı derecesini ahyânen Âsitâne'ye îsâl ve gılâl-i Haremeyn'in dahi rubʿ-i mürettebini envâʿ-ı cevr ü eziyyetle Haremeyn'e irsâl ve ol dahi ekle sâlih olmayup, hass ü hâşâk ile mâ-lâ-mâl olduğu zevâhir-i ahvâlden istidlâl olunduğundan tevbîhi mutazammın bundan akdem cümlesine hitâben ısdâr-ı misâl-i lâzimü'l-imtisâl olunmuşidi. Bu tehdîdât sebebi ile yetmiş senesinde ancak on üç bin erdeb gılâl-i mağşûş ibʿâs ve bu defʿa dahi envâʿ-ı ekâzîb ihdâs eylediklerinden fazla Mîrü'l-hâcc-ı Mısır olan Keşkeş Hüseyin Bey bilâ-sebeb Mekke-i mükerreme'de izhâr-ı şûr u şegab edüp, Şerîf-i Mekke'yi ʿazl ve yerine âharı vasl etmek cesâreti gibi emr-i ʿazîme iktihâm ve haddini tecâvüz eylediği o tarafdan ʿarz u iʿlâm olunup, bu makūle bâgīlerin cezây-ı mâ-yelîkları icrâ olunmak bâbında müteʿaddid fetvâ verilüp, ibtidây-ı emrde taraf-ı Saltanat'dan dirâyet-mend mebʿûslar ile habâyây-ı zamâyir-i fâsideleri istikşâf olunmak istihsân olunup, şöyle ki, zimmetlerinde ictimâʿ eden iki senelik temâmen ve üç senelik bekāyâ hazîneleri ve Rıdvân Kethudâ, Hulvânı'nın bakıyyesi olan bin kîseyi ve Haremeyn-i şerîfeyne müretteb olan kırk sekiz bin erdeb gılâli irsâl etmezler ise ve Mısır vülâtını meʾlûf oldukları şaʿbede ile medyûn çıkarup, kemâ fi's-sâbık rencîde ederler ise berren ve bahren üzerlerine asâkir-i vâfire taʿyîn ve verilen fetvâ mûcebince cerîde-i hayâtdan nâmları terkīn olunacağı, hatt-ı hümâyûn ile müveşşah evâmir-i celîlede tasrîh u tebyîn olunup, cihet-i itâʿatin selâmetini taraf-ı şerʿ-i enverden beyân içün ʿulemây-ı aʿlâmdan birinin meʾmûriyyeti dahi savâb-dîd-i erbâb-ı reʾy-i sedîd olmağla, bu hatb-ı ehemm bu defʿa İstanbul Pâyesi verilen ʿAbbâs Efendi'nin gerden-i himmetine taʿlîk [M1 149] ve Mîrahûr-i Evvel Mustafa Ağa ve Ocak-ı ʿâmire tarafından Seksoncu Pâyesi verilen Mustafa Ağa, mûmâ ileyhe terfîk olundu.