Müşârun ileyh Mısır tarafından Cidde'ye râhî ve bender-i mezkûr karargâhı oldukdan sonra mevsim-i hac hulûl edüp, tavâf-ı Beytullâhi'l-harâm meʾmûliyle Cidde'den birkaç sâʿat infisâlinde hastalanup, dâr-ı bekāya irtihâl eylediği Şerîf-i Mekke'ye ihbâr olunup, cenâzesini istikbâl ve Harem-i şerîfe getürüp, Bi’r-i Zemzem kurbunda gasl ve levâzım-ı sâyiresin ikmâl ve yedi kerre Beyt-i şerîfi [M1 146] tavâf etdirdikden sonra ezvâc-ı tâhirâtdan Hadîcetü'l-kübrâ radıyallâhü anhânın muhâzî-yi kabr-i şerîfinde ihzâr olunan lahde idhâl eyledi. Müşârun ileyh Dâvud-paşa mahallesinde sâkin bir merd-i sâlihin sulbünden zuhûr edüp, yirmi beş târîhinde Dîvân kalemine müdâvemet ve men sebete nebete kāʿidesine riʿâyet ve Yeni-kapu Mevlevî-hânesi'nde seccâde-nişîn-i reşâdet olan Peçevîli ʿArif Ahmed Efendi'nin şeref-i sıhriyyeti ile tahsîl-i mâye-i yümn ü bereket etmişidi. Dâyimâ duʿâsını celb ü igtinâm ve tahsîl-i rızâsını nukāve-i merâm eyleyerek tahsîl-i ʿilm ü edebe sarf-ı evkāt ve Nâyilî mahlası ile âsârı pesendîde-i erbâb-ı kemâlât olup, kırk üç târîhinde Beylikçi'ye Kîsedâr ve kırk dokuzda Beylikçilik mesnedinde karar ve Reʾîsülküttâb olan el-Hâc Mustafa Efendi'nin hüsn-i terbiyesiyle kesb-i iştihâr etmişidi. Ordu-yi hümâyûn Âsitâne'ye geldikde, Beylikçilik ile Teşrîfâtçılığı cemʿ edüp, murûr-ı ezmân ve kurûr-ı hidsân ile defâtir-i Teşrîfât berhem-zede-i habt ü halel olup, ıslâh u tenkīhi ʿuhdesine havâle olunmağla, mesâyil-i teşrîfâtı ahsen-i nesak üzere tebvîb ve verdiği nizâm her tarafından tasvîb olunup, hatt-ı hümâyûn ile tevşîh ve ilâ mâ-şâʾallâh hükmü cârî olmak me'âli nass-ı hatt-ı şerîfde tasrîh ve el-hâletü hâzihî derdest olan defâtir, eser-i himmeti ve ahlâfının medâr-ı dâniş ü dirâyetidir. Altmış senesi zilkaʿdesinde Re'îsülküttâb ve altı sene mikdârı o câh-ı ʿazîzü'l-menâl ile mahsûd-i emsâl ü etrâb olup, altmış yedi muharreminde Defterdâr-ı Şıkk-ı Evvel ve altmış sekiz şaʿbânında Sadâret-i ʿuzmâ ile mübeccel ve doksan bir gün murûrunda ʿazl ve nefy ile mükedder ve altmış dokuzda ıtlâk ile mübeşşer ve der-ʿakab Kandiye Eyâleti, müşârun ileyhe müyesser olup, yetmiş târîhinde Selânik ihsân olunmuşiken, yetmiş birde Silahdâr Mehmed Paşa fevtinden Cidde Sancağı mahlûl olduğunu istimâʿ ve Cidde'ye talebkâr olduğunu vükelây-ı devlete ismâʿ edüp, tıbk-ı iltimâsı üzere Cidde tevcîh olunmuşidi. Bâlâda tahrîr olunduğu vech üzere dâr-ı âhirete zâmile-bend-i sefer, o mahall-i nûrânîyi makarr eyledi. Müteveffây-ı müşârun ileyh fazl ü hüner ile mümtâz ve şîme-i sadâkatle ser-efrâz izâʿa-i evkātdan müctenib ve ʿale'd-devâm edeb u kemâli müktesib olup, riyâsetinde ʿAvnî Efendi'ye Vassâf Târîhi'ni bi't-temâm okudup, dersinden sâyir küttâb dahi müstefîd ve el-yevm ʿayb ʿadd olunan sıfat-ı kemâl o târîhlerde [M1 147] ne derecelerde memdûh olduğu bu keyfiyyetden zâhir ü bedîddir.