Şehr-i mezkûrun on ikinci günü Sadrıaʿzam ve Şeyhulislâm ve Âsitâne'de ber-vech-i müsâferet ikāmet üzere olan vüzerây-ı ʿizâm ve sudûr-i kirâm ve ricâl ve ocağlu ve sâyir huzûrları muʿtâd olan zevât Sultân Ahmed Câmiʿi'nde mevcûd bulundukları halde, Padişah-ı rubʿ-meskûn debdebe ve zînet-i gûnâ-gûn ile rû-nümûn olup, kudûm-i Şâhâne'lerine [M1 144] intızâr üzere olan bendegânı, tahrîk-i âb-rûy-i nevâziş ile mâlik-i re'sü'l-mâl-i istibşâr eylediler. Velâdet-i pür-saʿâdet-i Seyyidü's-sakaleyni câmiʿ olan nazm-ı şerîf kırâ'etiyle hâzır olanlar iktisâb-ı feyz-i rûhânî ve isticlâb-ı safây-ı vicdânî etdikden sonra, meşâyih-i selâtîn vaʿz u tezkîr ile terkīk-i kulûb-i Mü'minîn edüp, duʿây-ı Şâhâne ile hidmetlerin edâ ve muʿtâd olan kürklerini iktisâ eyleyüp, Şehriyâr-ı İskender-haslet yine dârât ve tantana-i saltanat ile serây-ı behişt-âsâlarına ʿavdet buyurdular.