Mahbes-i tengnây-ı Tersâne'de olan Malta esîrleri tedrîcî zindânı nakb ve lağımlar menfezinden yol bulup, otuz neferi leylen firâr ve bir neferi kesâfet-i cisim sebebiyle mazîk-ı lağım içinde kalup, râh-ı girîz bulamadığı ihbâr olunduğuna binâʾen, Tersâne zâbitleri havf-i cezâ ile muztarib ü gamgîn ve her tarafa âdemler taʿyîn ve ekserî Beyoğlu ve Istranca semtlerinde bulunup, tekrâr zindâna vazʿ ve rahnedâr etdikleri mahall tahsîn olunmuşidi. Tersâne Ağası'nın leyl ü nehâr zindânı muhâfaza ehass-ı me'mûriyyetinden iken, müsâmahası hakkında takrîʿât-ı şedîdeyi îcâb eylediğinden gayri vardiyân-başıları dahi te'dîb ve birkaç gün habs ile taʿzîb olunup, ancak Tersâne kethudâlarının dahi bu ahvâle nezâreti olup, vukūʿ bulan keyfiyyetin şe'âmeti hâlâ Tersâne Kethudâsı olan Hüsâmeddîn Paşa'ya sirâyet ve işbu rebîʿulevvel gurresinde ʿazl ve mansıbı olan Midillü'ye nefy olunup, mansıbı ile Rodos Sancağı Mutasarrıfı ʿOsmân Paşa-zâde İbrâhîm Paşa kesb-i rıfʿat eyledi.