Ocak Baş-yazıcılığından kesb-i neşv ü nemâ ve tayy-ı mesâfât-ı tarîk eyleyerek yeniçerilere ağa olan Vefâlı Mehmed Ağa, âlüfte-mizâc ve nâzik-meşreb belki li-külli mezhebin yezheb kabîlinden olup, bârgirân-ı tavr-ı hükûmete gayr-i mütehammil ve ʿale'l-husûs bu esnâda mübtelây-ı maraz-ı hâyil olduğu maʿlûm-i Şehriyâr-ı deryâ-dil olduğundan, işbu muharremi'l-harâmın on üçüncü günü Ağalık mesnedinden tenzîl ve sâbıkā Yeniçeri Ağası olan Ahıshalı Mehmed Ağa, o câh-ı bülend ile tebcîl olundu. Bostâncı-başı Ahmed Ağa'nın hidmeti, mizâc-ı hümâyûn'a gayr-i muvâfık olduğundan muharremü'l-harâmın on sekizinci günü maʿzûl ve Tebdîl Hasekîsi Halîl Ağa, yerine menkul olup, muktezây-ı hâl ile Hasekî Ağa dahi ʿazl ve Sadrıaʿzam Karakulâgî, Hüseyin Ağa yerine vasl olundu. Dîvân-ı hümâyûn'da Çavuş-başı olan Kara Mehmed Paşa-zâde Mahmûd Bey, saferu'l-hayrın altıncı günü ʿazl ile telh-mezâk ve Başbâkī-kulu Selîm Ağa, Çavuş-başılık ile mazhar-ı lutf-i Sadr-ı kerîmü'l-ahlâk olup, Abdal Mehmed Ağa, Başbakī-kulluğu ile sûr-zen-i sürûr ve ikinci Kapucu-başı Kara Mustafa Paşa-zâde ʿOsmân Bey, Mîrahûr-i Evvel Vekâleti'yle manzûr oldu.