terkîbi Sadâret-i sâniyelerine târîh vâkî olmuşdur. On sekiz mâh kadar icrây-ı ahkâm-ı Sadâret ve İran seferini te'hîr cünhasıyla elli altı şaʿbânının dördüncü günü ʿazl ve Midillü'de ikāmet ve çok geçmeden Kandiye ile huluvvü'l-mezâk ve elli yedi ramazânında tekrâr Bosna ile mazhar-ı eşfâk olmuşidi. Bir sene kadar memleket-i mezbûrede ifâza-i ʿadl ü dâd ve elli sekiz şaʿbânında Halebü'ş-şehbâ ile ber-murâd olmuşiken, Nâdir Şah'ın Kars tarafına ʿazîmeti tahkīk olunup, Anadolu Eyâleti'yle o tarafa Serʿasker nasb ü taʿyîn ve elli dokuz târîhinde musâlaha sadedi münteşir-i rûy-i zemîn olup, Serʿaskerliğ'e dâ'ir o tarafda maslahat kalmadığına binâʾen, Sivas'a doğru râyet-keş-i ʿazîmet ve Sadr-ı esbak Yeğen Paşa inhizâmına ʿillet olan levendât eşkıyâsının istîsâline me'mûr olup, ihtilâs-ı vakt-ı fursat ile o makūle kadr-i nân ü niʿmeti bilmez ru'esây-ı eşkıyâyı ve hevâdârlarından vâfir hazeleyi ser-i bürîde-i seyf-i siyâset edüp, Anadolu'yu keyd ü mazarratlarından tathîr ü tasfiye ve irâde-i kātiʿa-i Devlet-i ʿaliyye'yi te'diye etdikden sonra, sâlisen Bosna'ya Vâlî ve bir sene kadar mutesaddî-yi umûr-i ehâlî olup, baʿdehû Tırhala ve baʿzı mahallerde imrâr-ı eyyâm ü leyâlî etmişidi. Trabzon'da baʿzı eşkıyâ ve mütegallibe zuhûr edüp, kahr u tenkîllerine me'mûr ve o cânibleri dahi âzâde-i şerr u şûr etdiği hengâmda Anadolu Eyâleti tevcîh ve altmış sekiz Cumâdelûlâsının beşinci günü sâlisen Sadâret-i ʿuzmâ ile kadr ü iʿtibârı terfîʿ ve tenvîh olundu.