Müddet-i medîdeden berü Anadolu taraflarında ʿalem-efrâz-ı bagy ü şekā olan evbâş-ı levendât tahrîb-i bilâd ve ızrâr-ı ʿibâd ile zulm ü fesâdları gāyete resâ olduğundan, defʿ-i şekāvetleriyle teʾmîn-i mesâlik ve terfîh-i kuttân-ı memâlik matlûb-ı Şâhâne olup, birkaç defʿa etrâf ü eknâfa neşr-i berîd ve istîsâlleri husûsu tenbîh ü teʾkîd kılınmışidi. Her ne tarafa varsalar gümeştegân-ı devlet tarafından makhûr ve eyyâm-ı zindegânîleri teşvîş-i bâl ve ıztırâb-ı hâl ile murûr ve encâm-ı kâr Sarı Boşnak [M1 118] ve İnce ʿArab başlarında olan iki bin kadar eşkıyâ ile ʿAcem diyârına güzâr ve ʿadem-i kabûl ile gerüye ricʿat ve nevâhî-yi Erzurum'a ilgār etmişler idi. Erzurum Vâlîsi, bugāt-ı mezkûreyi tedmîr içün kethudâsını taʿyîn ü tesyîr ve iltikāy-ı cânibeyn vukūʿunda Paşa askeri gerüye çekilip, kethudâsı esîr ve fekk u halâsiyçün mâl-ı vefîr istihlâsından sonra Çorum Kasabası'na zarar ve gezendi izmâr ve o tarafa doğru râyet-keş-i idbâr oldular. Çorum ehâlîsi mukaddemce vâkıf-ı hâl olup, eşkıyâ bölükleri nümâyân oldukda, muhârebeye iştigāl ve hikmet-i Müteʿâl ile eşkıyâya perîşanlık târî olup, Sivas'a doğru münhezim ve Çorumlu dahi verâlarını bırakmayup, ekserini münʿadim eylediklerini Mîr-i mîrân-ı Sivas Zaralı-zâde Feyzullah Paşa istimâʿ ve ol dahi başında ictimâʿ eden asker ile çıkup, birkaç sâʿat muhârebeden sonra bi'l-külliyye kuvvet u sevretlerin intizâʿ eyleyüp, ekseri maktûl-i seyf-i siyâset ve ekalli reh-yâb-ı selâmet oldukları Paşa-yı mûmâ ileyh tarafından tahrîr ü işâret ve gönderdiği ru’ûs-i menhûse nihâde-i meydân-ı mezellet ve mûcib-i ʿibret-i erbâb-ı gavâyet kılındı. Paşa-yı mûmâ ileyhin bu vazʿ-ı dilîrânesi pesendîde-i tabʿ-ı Pâdişâhî olup, rütbe-i vâlâ-yı Vezâret'le çırâğ ve ihyâ ve bu nüvîd-i meserret ʿalâ cenâhi'l-istiʿcâl tarafına isrâ olundu.