Şevvâlü'l-mükerremin on sekizinci günü Kara-ağaç Bağçesi'ne nakl-i hümâyûn vâki olup, yirmi altıncı günü kemerler seyrine rağbet-i Şâhâne tehakkuk eylediğinden, berren sâde nakkāre ile mahall-i mezkûre zıll-efgen-i şevket ve yine ol gün Büyükdere'den Kara-ağac'a mikzâf-ı cünbân-ı ʿavdet oldular. Mahrûse-i Edirne'de vâkiʿ olan dâʾire-i hümâyûn ve Serây-ı Âsafî ve Defterî ve tevâyif-i askerî kışlakları ve Istabl-ı ʿâmire'nin ekser mahalleri altmış dört ve altmış beş senelerinde vâkî zelzeleden münhedim ve ʿale'l-husûs es-sirru fi's-sükkân lâ-fi'l- mekân beyânınca müddet-i vâfireden berü râyât-ı zafer-âyât-ı Pâdişâhî o câniblere teveccüh etmediğinden, kalib-i bî-rûh gibi o serây-ı behişt-âsânın letâfeti münʿadim olup, muhtâc-ı termîm olduğu maʿrûz-ı ʿatebe-i sâhib-i tâc ü dîhim kılındıkda, taʿmîrine irâde-i hümâyûn teʿalluk edüp, sâbıkā Sadrıaʿzam Kethudâsı, Yûsuf Efendi ve baʿzı ebniyyeye meʾmûriyyetiyle tahsîl-i meleke vü kābiliyyet eden Cânibî dâmâdı Ahmed Efendi, bi'l-mürâfaka meʾmûr ve iktizâ eden evâmiri şeref-sudûr olduğundan başka, ʿale'l-hisâb elli bin guruş teslîm olunup, iki bin kadar bennâyân ve ʿameleden başka li-ecli'l-keşf ve't-tahmîn Miʿmâr Ağa taʿyîn kılınup, eştât-ı meʾmûriyyetleri bu vechile cemʿ u tehvîn olundu. Trablus Ocağı tarafından beher sene Der-i devlet-medârı ʿarz u takdîmi muʿtâd olan hedâyâ, Trablus Defterdârı yediyle vâsıl-ı Dergâh-ı muʿallâ oldu. Âsitâne-i saʿâdet'de duʿây-ı bekā-yı Şâhâne'ye müdâvim olan Muhsin-zâde Vezîr Mehmed Paşa, târîh-i mezkûrda şebîbe-i câh-ı Halebü'ş-şehbâ'dan munfatim olup, Diyârbekir Eyâleti'yle, dest-zen-i şevk u tarab ve selefi Sadr-ı esbak ʿAbdullah Paşa dahi Vâlî-yi vâlây-ı Haleb oldu.