Müşârun ileyhimâya mukaddemâ daʿvetçi irsâl olunduğuna binâʾen, şevvâlin dokuzuncu günü Silahdâr Mehmed Paşa'nın Âsitâne-i saʿâdet'e duhûlü ihbâr ve Sadrıaʿzam tarafından Behâriye'de yemeklik ihzâr olunup, ʿale's-seher müşârun ileyh yemeklik yerine gelüp, tenâvül-i mâ-hazardan sonra yedi çifte ile Bağçe-kapusu'na ve andan Bâb-ı Âsafî'ye vârid ve takbîl-i dâmen-i Âsafî ile müstesʿid oldukda, serâ-sere kaplu bir sevb-i semmûr ilbâsıyla mükerrem ve seng-i rikâbda taraf-ı Sadr-ı aʿzamî'den âmâde kılınan müzeyyen esbe süvâr ile Bağçe-kapusu'na ve andan Orta-köy'de vâki Sahil serây-ı hazret-i Sultânî'yi vazʿ-ı kadem ve baʿde'l-ʿişâ Dârü's-saʿâde Ağası maʿrifetiyle haclegâh-ı ʿismet-penâhîye rûmâl ve şeref-i zifâf ile dâğzen-i kulûb-i emsâl oldu. Haleb Vâlîsi Vezîr Muhsin-zâde Mehmed Paşa dahi Âsitâne'ye tekarrub ve şevvâlin on altıncı günü şehre duhûl içün teʾehhüb etdiği maʿlûm-i Âsafî oldukda, Dâvud-paşa'da yemeklik tertîbi tavsiye ve merâsim-i nüzul ve ziyâfet ke-mâ yenbagī teʾdiye olunup, taraf-ı Sadrıaʿzamî'den tertîb olunan bir kat libâs ve bir kat câme-şûy ile müşârun ileyh terhîb ve Bâb-ı Âsafî'ye gelüp, ilbâs-ı semmûr ile tatyîb ve seng-i rikâbda âmâde kılınan esb-i müzeyyene rükûb ile Kadırga Limanı'nda vâki Serây-ı Sultânî'ye nâzil ve baʿde'l-ʿişâ emsâli gibi Serây-ı ʿismet-penâhîye dâhil olup, [M1 117] yevm-i zifâfın ferdâsı yine Bâb-ı ʿâlî'ye kudûm ve hasbe'l-ʿâde hakkında icrây-ı rüsûm kılındı.