İki devirde Çavuş-başı ve bu defʿa Vezîr-i aʿzam Kethudâsı olan Ahıshalı Mehmed Ağa, zâtında müdebbir u cesûr ve mehîb ü vakūr ve meʿârif ü kemâlden hisse-yâb bir cevher-i nâdir u kemyâb olduğundan başka, taraf-ı Sadrıaʿzamî'ye müntesib ve her bâr rızâsını müktesib olup, vaktinde çırâğ ve sâyesinde nâyil-i refâğ olması câygîr-i zamîri idi. Şaʿbân-ı şerîfin on ikinci günü mesned-i Vezâret'e ehliyyeti ʿarz-ı ʿatabe-i Şâhâne kılınup, telhîsi müsâʿadeye makrûn ve rütbe-yi vâlâ-yı Vezâret tevcîhiyle kadr u iʿtibârı efzûn ve Rumeli Eyâleti'yle debdebe-i şânı vâsıl-ı evc-i çarh-ı nîlgûn oldu. Sâbıkā Sadrıaʿzam Kethudâsı olup, Defter Emâneti'nden maʿzûl ve duʿây-ı bekā-yı Pâdişâhî'ye meşgūl olan Hamza Hâmid Efendi, mükerreren Kethudâlık hidmet-i menîʿasıyla reh-yâb-ı gümgeştegî vü hamûl oldu.