Müşârun ileyhin müddet-i vâfireden berü Emâret-i Hac ile iştigāli ve esâfil-i nâsa muhtas olan ticâret ve mukavvimlik gibi ahvâli beyne'l-ehâlî mûcib-i zevâl-i teʿayyün ve istiklâli olduğundan gayri, Emâret-i Hac zâtına muhtâc olduğunu zuʿm ile havf-i devleti kalbinden ihrâc ve etrâf ile katʿ-ı rişte-i imtizâc eyleyüp, re’yinde müstebid ve fiʿlinde münferid ve Dârü's-saʿâde Ağası'yla dahi li-emrin mâ mübâgaza vü münâfese üzere olup, bu ekāvîl ile âkıbet Hudâvendigâr-ı mebrûru ihâfe vü irhâb ve Şâm'dan insırâfını îcâb etdirmişler idi. Mekkî-zâde Hüseyin Paşa gibi ser u sâmân bir şahs-ı nâ- tüvân bu hatb-ı ʿazîmin ʿuhdesinden gelemiyeceği nümâyân ve bir bâdire zuhûruna halk nigerân iken o hâdise-i [M1 113] müdhişe vukūʿ ve Esʿad Paşa igrâsiyle zuhûr etdiği vâkiʿ ve gayr-i vâkiʿ beyne'n-nâs şuyûʿ bulup, tahkīk-i mâdde zımnında irhây-ı ʿinân ve Esʿad Paşa'ya, Sivas tevcîh ve tarafına ısdâr-ı emr-i ʿâlîşân kılınmışidi. Şâm ve o havâlîde bulunan hussâd ve aʿdâsı kazıyyeyi hakka şebîh mugāletât ile isbât ve hayâtda oldukça âhar kimseler bu maslahatı idâre edemeyüp, tarîk-ı hac gayr-i meslûk ve bu farzın edâsı bi'z-zarûre metrûk olacağını müeyyed irsâl-i tahrîrât etmeleriyle, müşârun ileyhin tûg u sancağı refʿ ve Resmo'ya defʿ olunup, menfâsına gider iken Ankara'da Hasekî maʿrifetiyle iʿdâm ve ser-i maktûʿu mevzûʿ-i ʿibret-gâh-ı enâm kılındı. Nazm: Ve men lem yemut bi's-seyfi mâte bi-gayrihi Tenevveʿati'l-esbâbü ve'l-mevtü vâhidun Müşârun ileyhin geçidi bu yüzden olup, zâtına isnâd olunan cürm gayr-i sarîh ve ism-i kabîh dahi muhakkak ve sahîh olduğunda nazar vardır.