Mâh-ı mezkûrun onuncu günü Re'îsülküttâb olan ʿAbdî Efendi ʿazl ve Burusa'ya nefy ile mübtelây-ı muzâyaka vü ezell olup, mâhiyyeti eşher mine'l-kamer ve tedbîri emzâ mine'l-kader olan Mektûbî-yi Sadr-ı muvakkar Kâşif Mehmed Emîn Efendi, Riyâset-i Küttâb hidmetiyle şeref-yâb ve Mektubçuluk ile Sadriaʿzam-ı Dîvân Kâtibi ve el-yevm Cebecîler Kâtibi olan İbrâhîm Efendi, ke'l-evvel mâlik-i nisâb-ı iktirâb ve Baş-halîfe olan Mihrî Mehmed Efendi, Baş-halîfelik'den Kitâbet-i mezkûre ile ihrâc ve Baş-halîfelik ile hüner ü maʿrifeti vâreste-i ihticâc olan el-Hâc Mehmed Efendi, vâyedâr-ı ibtihâc kılındı. Çavuş-başı ʿAbdî Ağa, hidmetinde gayr-i muvaffak olduğundan ʿazl ve yerine sâbık Başbâkī-kulu Ebûbekir Ağa mülhak oldu. Baş-muhasebeci olan Halîmî Mustafa Efendi, me'lûf olduğu gurbet ile bu defʿa dahi imtihân ve Gelibolu'da ikāmetiyçün ısdâr-ı fermân olunup, Râmî Paşa-zâde Mustafa Bey, Muhasebe-i Evvel mansıbı ile terfîh ve Nemçe Sefâreti'yle ʿâzim olan Resmî Ahmed Efendi'nin mansıbı olan Küçük Evkāf, Tersâne Re'isi Süleymân Efendi'ye tevcîh olundu. Cidde Vâlîsi Sadr-ı sâbık Seyyid Mehmed Paşa, hulûl-i ecel-i mevʿûdiyle vefât edüp, mansıbı münhal olmağla, Selânik Mutasarrıfı Sadr-ı esbak Nâyilî ʿAbdullah Paşa, Cidde'ye Vâlî ve Selânik Sancağı'yla, Köstendil Mutasarrıfı bulunan Mîr-i mîrân Mehmed Paşa'nın kadri ʿâlî kılındı. Cebeci-başı Kadri Ağa-zâde maʿzûl ve Surre Emâneti ile nâyil-i me'mûl olup, Cebecî-başılık, sâbıkā Topçu-başı olan Kapucu-başı Mustafa Ağa'ya menkül oldu.