Merhûm Dârü's-saʿâde Ağası Ebûkuf Ahmed Ağa'nın Yedekçi-başısı olan Türkmân Mehmed Ağa, ʿan asl Türkmân Mîr ʿAşîreti ʿAli Bâz'ın şütürbânlarından iken, Âsitâne'ye gelüp baʿdehû Mısır'a ʿazîmet ve Ağa-yı müşârun ileyh dahi o târîhde Mısır'da ikāmet üzere bulunup, dâmen-i himmetine âvîhte-i dest-i hidmet etmişidi. Sevk-i kader ile ağası Âsitâne'ye vârid ve Ağalık mesnedine mütesâʿıd olup, merkūm eyyâm-ı felâket kâr-güzârlarından ve hengâm-ı gurbet ü kürbet hidmetkârlarından olduğuna binâʿen, hakkında vefâdârlık edüp, defʿaten Yedekçi-başı eyledikde, Türkmân Ağalığı buhârı dimâğına suʿûd ve baʿzı kimselere izhâr-ı nahvet ve isbât-ı vücûd içün yetmiş senesinde Türkmân Ağalığı'nı tahsîl ile nâyil-i maksûd olmuşidi. Debdebe vü dârât ile Anadolu tarafına ʿâzim ve niʿmetiyle perverde olduğu ʿAli Bâz'ı ve bir nefer oğlunu bilâ-sebeb seyf-i gadr ile münʿadim eyleyüp, bu vazʿ-ı nâ-hemvâr Türkmân tâyifesini dilhırâş-ı ekdâr eylediğine binâʿen, cemm-i gafîr ile üzerine sell-i şemşîr ve bir-takrîb ellerinden halâs olup, iki nefer âdemîsiyle Sivas'a geldiğini ve mecmûʿ-i eşyâsı dest-bürd-i yağma-gerân olduğunu tahrîr edüp, izhâk-ı rûh misillü harekete cesâreti mûcib-i inkıbâz-ı kulûb-i evliyây-ı devlet olduysa dahi, ʿızâm-ı şân müstenid-i icrây-ı cezây-ı sezâsına sedd olup, cülûs-i meymenet-me'nûs tâliʿ-i baht ü ikbâllerin bâz gûne ve maʿkûs eylediği müddeʿîlerine mahsûs oldukda, rikâb-ı ʿadâlet-nisâba pîrâhen-i hûn-âlûd ile bess-i şekvâ ve ihkāk-ı hak recâ etmeleriyle, Sadr-ı Rûm Efendi huzûrunda mürâfaʿa olunup, kısâs lâzım geldiği huzûra iʿlâm ve mûcebince merkūm izâle vü iʿdâm ve ser-i maktûʿu galtîde-i meydân-ı intikām kılındı.