Sekiz seneden berü tekmîli mukadder olmayan Üç Anbarlı kalyon ihmâl ve taksîr ile bu âna dek tekmîli karîn-i ʿukde-i teʾhîr olmuşidi. Himmet-i Sadâret-penâhî ile iki mâh zarfında o Cebel-i Kâf-deryâ bilâ-kusûr resîde-i hayyiz-i intihâ olduğundan başka, mukaddemâ inşâsına müceddeden mübâşeret olunan Hısn-ı Bahrî nâm kalyon dahi tekmîl ve cumâdelûlânın ikinci günü tenzîl olunacağı ihbâr [M1 107] olunmağla, yevm-i mezkûrda Pâdişâh-ı âlem-penâh Tersâne-i ʿâmire'ye sâye-endâz ve mukaddemce kudûm-i hümâyûnlarına intizâr üzere olan Sadrıaʿzam ve Şeyhulislâm ve Ağa Paşa ve Kapudan Paşa ve sâyirleri iltifât-ı Mülûkâne'leriyle ser-efrâz olup, Üç Anbarlı'nın orta köşkü tarafında darb olunan sâye-bân-ı bülend-eyvânlarına ferah-bahş-ı kuʿûd ve her cânibden 'ʿaleyke ʿavnullâh' sadâsı resîde-i târem-i çarh-ı kebûd olup, vakt-i muhtâr hulûlünde o fülk-i felek-peyker; 'Ke-calmûdi sahrin hattahü's-seylü min ʿal' mefhûmu üzere deryâyı makarr edüp, şükran li-hâze'n-niʿam zebh-i karâbîn ve bezl-i kerem kılındıkdan sonra, Tersâne-i ʿâmire Emîni'ne hilʿate bedel ikrâmen semmûr kürk ilbâs ve sâyirlerine dahi ber-mûceb-i defter-i rûznâmçe hilʿatler geydirilüp, her biri mazhar-ı lütf-i bî-kıyâs kılındı. Hısn-ı Bahrî yerden indi bahre Birden dediler târîh-i garâsı sefîne-i mezkûrenin nüzûlüne inşâd olunup, sihr-i helâl ve kehânet-i şuʿarâdan münbaʿis bir hâl olduğu zâhirdir.