Hemşîre-i celîle-i hazret-i Şehinşâhî ʿismetlü Zeyneb Sultân ʿaliyyetü'ş-şân hazretlerinin halîl-i mükerremleri Vezîr Küçük Mustafa Paşa, on beş seneden berü Anadolu mansıblarında mâh-ı serîʿu's-seyr gibi deverân ve seher-i dâyim ve hicr-i tavîl ile sergerdân olduğunu Şehriyâr-ı zemân tahkīk u îkān edüp, hakkında rahm ü şefekat-i Şâhâne nümâyân ve Âsitâne-i saʿâdet'e getürülmesi güzârende-i zebân olduğuna binâʿen, daʿvetiyçün ısdâr-ı fermân kılınmışidi. Müşârun ileyhe bu haber-i hayr vâsıl ve derûnunda şevk u sürûr mütekâmil olup, matıyye-i istiʿcâle râkib ve Âsitâne-i saʿâdet'e âyib ve doğru Bâb-ı ʿâlî'ye şitâb ve takbîl-i dâmen-i Sadr-vâlâ cenâb eyledikde, serâsere dûhte [M1 106] bir sevb-i semmûr ile tefrîh ve Mora mansıbı tevcîhiyle bir zemân vâreste-i gerdiş-i arz-ı fesîh kılındı.