Hekîm-başı Halebî Mustafa Efendi, eşiddâ-i Yehûd'dan iken, bir-takrîb millet-i beyzâ-yı İslâm'a dühûl ve sanʿat-ı tabâbet iktizâsıyla devâyir-i kibâra hulûl edüp, Hudâvendigâr-ı sâbık-ı merhûmun vâlidesine Serây-ı ʿatîk'da iken, tîmâr u muʿâlecesi mizâcına muvâfakat ile hakkında bir gûne ʿinâyet izmâr etmişidi. Nevbet-i saltanat Sultân ʿOsmân Hân hazretlerine intikāl eyledikde, ʿahde vefâ ve Hekîm-başılığı merkūma recâ ve fi'l-hâl Re'îsü'l-etibbâ ve Medrese ru'ûsuyla merkūmu bâhirü'l-iʿtilâ eyledi. Çok geçmeden Kayseriyye Mevleviyyeti'ni ihrâz ve Kudüs Pâyesi'yle kesb-i imtiyâz eyleyüp, taferât ve harekât-ı nâ-bercâsı ricâl-i tarîkı dâğdâr ve üfül-i necm-i iʿtibârını rasad-gâh-ı intizâr etmişler idi. Tegayyürât-ı devr sebebi ile o makūlelerin dâyire-i Hümâyûn'dan tard ü tecnîbi resm ü ʿâdete karîb olduğundan, merkūm dahi ʿazl ü tenkîb ve evâhır-ı saferu'l-hayrda Limni Cezîresi'ne tagrîb ve Hekîm-başılık ile ʿArif Efendi, dâyire-i hümâyûna takrîb olundu. İmâm-ı Evvel-i Sultânî Hasan Efendi dahi İmâmet'den sâkıt ve yerine sâbikā İmâm-ı Evvel olup Konya Mevleviyyeti'nden munfasıl Mehmed Efendi, merreten baʿde uhrâ mutevâsıl ü mürtabıt oldu. Dârü's-saʿâde Ağası Yazıcısı Kayseriyyeli İbrâhîm Efendi, bundan akdem mezîd-i tekarrub ve nüfûz-i kelime ile mütesaddî-yi umûr-i ʿizâm ve ʿazli câygîr-i zamîr-i Pâdişâh-ı enâm olmağla, yevm-i mezkûrda ol dahi ʿazl ve mevkūfât ile dâ'ire-i hümâyûndan [M1 96] ibʿâd ve yazıcı hulefâsından Bey Halîfe kitâbet-i mezkûre ile dilşâd kılınup, Baş-halîfe Mustafa Efendi dahi tarden li'l-bâb münʿazil ve Haremeyn Mukātaʿacılığı rütbesine vâsıl oldu.