Mâh-ı mezbûrun yirmi beşinci günü Şehriyâr-ı ʿâlî-tebâr müretteb alay ile hazret-i Hâlid'de taklîd-i seyf içün esb-i şevkete süvâr olup, yevm-i mezkûrda huzûrları ʿâdet olan bi'l-cümle erkân-ı saltanat yerlü yerlerinde edây-ı hidmet eyleyerek Eski Odalar'a tekarrub olundukda, altmış bir cemāʿatin oda-başısı ber-muʿtâd-ı kadîm hem meşreb-i ke's-i tesnîm olan şerbet-i hoşgüvârını arz u takdîm eyledikde, Pâdişâh-ı Felâtûn-hûş şerbeti nûş ve yemm-i birr ü ihsânları hurûş [M1 95] edüp, kâseyi zer ile mele'ân ve Oda-başı dahi muʿtâd olduğu vech üzere üç re's kebş-i emlahı yoluna kurbân eyledi. Bundan sonra tahrîk-i rikâb-ı cihândârî pîş ü pesde saf-beste-i meskenet ü ibtihâl olan bendegânı mazhar-ı eltâf-ı nevâzişkârî buyurarak, cedd-i aʿzamları Sultân Mehmed Hân eskenehüllâhü fî aʿle'l-cinân hazretlerinin merkad-i münevverlerini teşrîf ve kırâ'et-i Fâtiha-i şerîfe ile rûh-i pâkîzelerin taltîf ʿakabinde tekrâr tahrîk-i pây-ı rehvâr ve hazret-i Hâlid türbesine vüsûl ile o yâr-ı vefâdârdan istimdâd-ı rûhâniyyete ibtidâr eylediler. Baʿdehû Şeyhulislâm Efendi duʿây-ı seyfi niyâm-ı dehândan ihrâc ve miyân-ı Şehinşâh-ı zemâne taklîd-i seyf ile mukaddime-i hidmeti intâc eyleyüp, maslahat-ı mezkûre bu vech-i vecîh ile karîn-i hıtâm ve Şehriyâr-ı Dârâ-gulâm, bahran Serây-ı ʿâmire'lerine şeref-endâz-ı ʿizz u ihtişâm oldular.