Muhterik olan Bâb-ı ‘âlî destyârî-yi himem-i Pâdişâh-ı pür-meʿâlî ile resm-i evvelden bâlâter-binâ olunup, sinîn-i sâbıkada ola geldiği vech üzere tertîb-i ziyâfet olunacağı bâ-telhîs hâk-i 'atebe-i Mülûkâne'ye 'arz u inhâ olunmuşidi. Şevvâlü'l-mükerremin altıncı hamîs günü Pâdişâh-ı Dârâ-gulâm hıyre-sâz-ı aʿyün-i hâss u ‘âm olan debdebe-i Mülûkâne ve tantana-i Hüsrevâne'leriyle Timür-kapu'dan çıkup, Paşa-kapusu'na tekarrublarında müstakbilîn-i hademe-i bâb ve sadr-ı âlî-cenâb seng-i rikâba dek râcilen meşy ile îfây-ı hakk-ı hidmet-güzârî eyleyüp, rehvâr-ı sabâ-reftârdan devlet ü übbehetle nâzil ve şeref-i makdemleriyle ‘Arz odası'nı kasr-ı cennete mümâsil eylediler. Sâzendegân ve hânendegân negamât-ı cân-güdâz ile kulûb-i kavâbile ifâza-i rûh-i sânî ve sâyir bâzendegân dahi icrây-ı sanâyiʿ-i maʿrûfeleriyle muharrik-i ‘ırk-ı zevk-i vicdânî oldular. Bundan sonra ferşhân ve ihzâr-ı etʿime-i mütenevviʿu'l-elvân kılınup, maslahat-ı taʿâm hıtâm buldukda, mahdûm-i Sadr-ı aʿzamî huzûr-i hümâyûna getürdilüp, Hâssa silahşörlerine ilhâk ve müzeyyen bir re's esb ve sâyir ʿatâyâ ile mazhar-ı nevâziş-i Pâdişâh-ı âfâk kılındı. Sadrıaʿzam tarafından tertîb ve tehyi'e olunan esb-i müzeyyen ve mücevherât ve tefârîk-i sâyire ʿarz-ı huzûr-i lâmiʿu'n-nûr kılınup, hediyyesi kabûle karîn ve hidmeti vâsıl-ı ser-menzil-i tahsîn olduğundan, menkib-i Âsafâneleri bir sevb-i semmûr ile tezyîn olundu.