Sadr-ı esbak ve civâr-ı Hakk'a mülhak olan Çorlulu ‘Ali Paşa'nın hafîdi ve Gül Ahmed Paşa merhûmun necl-i reşîdi olan ‘Ali Beyefendi'nin kemâl ü isti‘dâdı gün gibi zâhir ü celî ve hüsn-i şemâyil ü sîreti 'umûm-i nâsa gayr-i hafî olup, halbetü'r-rihân fehm ü 'irfânda âharı lâhik kendi sâbık ve emsâl ü akrânını zât-ı bergüzîde sıfâtına nisbet kıyâs maʿa'l-fârik kabîlinden olduğuna binâʼen, hakkında nazar-ı iksîr-eser-i Şâhâne müstemirru'z-zuhûr ve re'sü'l-mâl-i ticâretgâh-ı ikbâl olan iltifât-ı Hüsrevâne bâre-i sâdıkānesinde mütetâbiʿu's-sudûr olup, erbâb-ı hüccet ü nazar: İnne’l-hilâle izâ raʼeyte nümüvvehû eykante en-seyekûne bedren kâmilen bürhânı üzere eserden mü'essire istidlâl ile bürûz-i neyyir-i ikbâline medd-i târ-ı basar etmişler idi. İşbu muharremü'l-harâmın beşinci günü o mîr-i sütûde-tedbîr şâyeste-i elkāb-ı vezîr olup, menşûr-ı Eyâlet-i Rumeli dahi ismine terkīm ve dâyiresini ber-vech-i etem tanzîm ile [M1 86] mansıbı tarafına ‘azîmeti tasmîm eyledi. Müşârun ileyhin Vezâret'i sebebi ile Büyük Mîrahûrluk münhal olup, Mîrahûr-i Sânî olan ‘İvaz Paşa-zâde Halîl Bey, Evvel ve sâbıkā Kapucular Kethudâsı Bergosî Mehmed Ağa, Küçük Mîrahûrluk ile nâyil-i kusvây-ı emel oldu.