Sâl-i mezkûr muharreminin yirmi beşinci günü bir kıst mevâcib çıkup, râtibehârân-ı dergâh-ı muʿallâ, erkân-ı niʿam-i celîle-i Şâhâne'den hâyiz-i kıst-ı evfây-ı birr ü ihsân oldular. Tersâne sâhasında inşâ ve Vefk-i Devlet ismiyle müsemmâ kılınan kalyon ʿavn-i Hak'la itmâm ve deryâya nüzûl istiʿdâdını kesb eylediği maʿrûz-i ʿatebe-i Şehriyâr-ı enâm kılınmışidi. Şehr-i mezkûrda âbâ vü ecdâd-ı vâlâ-nijâdları iʿtiyâdı üzere Tersâne'yi teşrîf ve huzûrları resm olanları iltifât-ı Şâhâne ile taltîf ʿakabinde vakt-i muhtâr hulûl ve bilâ-meşakka o sefîne-i kûh-misâl rûy-i deryâya nüzûl eyledi. Defterdâr-ı Şıkk-ı Evvel olan Ahmed Efendi, [M1 87] mübtelây-ı ʿazl-i nâgeh-zuhûr ve Gelibolu'ya nefy ile mağdûr olup, sâbıkā Defterdâr ve hâlâ Yeniçerî Kâtibi olan Memiş Efendi, o câh-ı bülend ile refîʿu'l-mikdâr oldu.