Birkaç defa Sipâh Ağası ve ricâl-i devletin ser-hayl-i meydân-ı akviyâsı olan Re'îs Kethudâsı Mustafa Ağa, leyletü'l-ʿîd merg-i fücâ’î ile ʿâlem-i hestîden nâ-bedîd oldu. İhrâk-ı kebîr sebebi ile baʿzı Hudâ nâ-ters harîk-zedelerin emvâline dest-res olup, bilâd-ı baʿîdeye nakl ve beyʿ u semenini baʿı metâlib-i sâfilelerine sarf u defʿ eyleyecekleri mütehakkak olduğundan, etrâf ü eknâfa evâmir-i şerîfe irsâl ve o makūle yağmacılar teftîş ü su'âl ve eyâdî-yi hıyânetlerinde vâfir eşyâ vü emvâl çıkup, refte refte Âsitâne'ye vusûl buldukça baʿde's-sübût ashâbına teslîm ve bu lütf-i ʿamîm sebebi ile muhteriku'l-fu'âd olan katî çok kimseler tatyîb ü tenʿîm olundu.