Marʿaş Vâlîsi Vezîr ʿAbdurrahmân Paşa, Dârendeli merhûm Vezîr Hüseyin Paşa'nın yeğeni olup, bir müddet taşra vüzerâsına ve Kara Mehmed Paşa-zâde Vezîr Mustafa Paşa'ya Kapudan iken Kethudâ olup, istiʿdâdı nümâyân olduğundan, Kapucubaşılık ihsân olunmuşidi. Bir zemândan sonra Çavuşbaşı nasb olunup, kulûb-i evliyây-ı devleti hüsn-i sîret ve lisân-ı ʿazb ile celb etmişidi. Meşiyyet-i Lem yezelî iktizâsıyla Vezâret'le kadri ʿâlî ve Marʿaş Eyâleti'ne vâlî olup, yollarda riʿâyet-i hazm ü ihtiyât ve serserî geşt ü güzâr ile fukarâ-yı ızrâr eden levendâtı dâyiresine irtibât ve lede'l-iktizâ eyâlet dâhilinde olan eşkıyâya taslît ile [mısrâ]: Zi-her taraf ki bûd küşte sûd-i İslâmest fâyidesini zihninde ihfâ etmişidi. Marʿaş'a vusûlünde Bektaşlı ve Kılıçlı kabîleleri şedîdü'ş-şekîme ve kesîru'l-ʿaded eşhâs olup, ebnây-ı sebîli nehb ü gāret muktezây-ı cibilletleri ve vüzerây-ı ʿizâma ʿadem-i itâʿat eski ʿâdetleri olmağla, baʿzı tenbîhât ile şâyed salâha meyl ve me'lûf oldukları habâsetden cerr-i zeyl ederler ümmîdiyle kabîle-başılarına âdem gönderüp, bî-muhâbâ huzûruna geldiklerinde izhâr-ı rûy-i istînâs ile cümlesine hilʿatler ilbâs ve fî-mâ-baʿd bağy ü şekāya tesaddî ve ebnây-ı sebîl ve fukarâya teʿaddî etmekden tebâʿudleri tenbîh ve ismâʿ ve sâlimen mahallerine ircâʿ olunmuşlar idi. Çok geçmeden etrâf zuʿafâsını ızrâr ve ebnây-ı sebîl ve tüccârı berhem-zede-i hasâr eyledikleri, Vezîr-i müşârun ileyhe be-dîdâr oldukda, âhar bir kabîleyi ıslâh içün [M1 85] bi'n-nefs hareketini işâʿa ile zikr olunan iki kabîleden yüz kadar müteʿayyen kimse taleb edüp, anlar dahi fikr-i âhar mütâlaʿa etmeyüp, daʿvetine icâbet etmişler idi. Rü'esây-ı eşkıyâ olan on beş neferi iʿdâm ve sâyir rüfekālarının dahi beyne'l-hıyâm eyâdî-yi askerde kârları itmâm kılınup, yatakları olan ʿaşîret üzerine dahi bin nefer süvârî irsâl ve ekserini istîsâl edüp, nihân-hâne-i melʿanetlerinde zuhûr eden eşyâ vü emvâl, isbât olundukça ashâbına teslîm ve o havâlînin emniyyetini istihsâl eylediğini ʿarz-ı Der-bâr-ı ʿatûfet-iştimâl eyledi.